Në fund të vitit që sapo lamë pas, qeveria njoftoi se kompanitë e lidhura në tensionin 35 KV, që kanë dalë në tregun e liberalizuar në vitin 2019, do të mund ta sigurojnë energjinë me 34 lekë/ kWh. Kjo pasi, kishte shtyrë Korporatën Elektroenergjetike Shqiptare të merrte pjesë në procedurën e blerjes të hapur nga Furnizuesi i Tregut të Lirë, duke hyrë në garë me çmim preferencial përballë 7 kompanive, që ofruan çmime tregu.
Megjithatë, të dhënat mbi këtë tender nuk janë publike, ndërsa OSHEE refuzoi kërkesën e TV për t’i vënë në dispozicion, ndonëse u angazhua për të kundërtën. Në takimin me përfaqësues të bizneseve dhe prodhuesve të energjisë, ku ministrja e Infratsrukutrës dhe Energjisë, Belinda Balluku bëri me dije lajmin, deklaroi se procedura ka qenë tërësisht e ligjshme dhe transparente.
Por, pavarësisht këtyre deklaratave, procedura e blerjes së energjisë nga Furnizuesi i Tregut të Lirë, jo vetëm që nuk ka qenë transparente, por platforma online ku kryhen këto transaksione e që menaxhohet nga Operatori i Shpërndarjes së Energjisë Elektrike, është jashtë funksioni.
Si rregull, në kalendarin që është pjesë e kësaj platforme publikohet tenderi me të dhënat mbi sasinë e energjisë që kërkohet të blihet, ndërsa në përmbyllje të procedurës prokuruese bëhen publike kompanitë që marrin pjesë dhe çmimet që ofertojnë.
Por, ndryshe nga kjo praktikë e mëparshme, nuk ekziston asnjë e dhënë mbi kohën kur është kryer kjo procedurë, kompanitë pjesëmarrëse dhe përse Korporata Elektorenergjetike Shqiptare është shpallur fituese. OSHEE nuk dha një përgjigje për TV mbi arsyet e mosfunskionimit të platformës. E njëjta praktikë e mungesës së transparencës është ndjekur edhe nga KESH, përgjatë gjithë vitit që lamë pas, duke mos dhënë asnjë detaj mbi kompanitë, që qarkullojnë miliona euro nga paratë publike.
Ola Mitre/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
