Albpetrol prodhoi në vitin 2024 mbi 70 mijë tonë naftë, me një rritje modeste prej 1.8 për qind në raport me vitin paraardhës.
Të dhënat zyrtare të publikuara nga vetë kompania publike tregojnë në tërësi një nivel të qëndrueshëm prodhimi nga koha e pandemisë kur prodhimi preku nivelet më të ulëta të 6 viteve paraardhëse.
Në vitin 2020 kur bota u vu nën pushtetin e COVID-19 prodhimi i naftës nga Albpetrol shënoi nivelin mbi 40 mijë tonë.
Në atë kohë kufizimet në lëvizje por edhe kufizimi i aktivitetit ekomomik e zhvlerësuan totalisht arin e zi. Më pas në vitin 2021 prodhimi u rrit me pak më shumë se 30 për qind për të vijuar pastaj gradualisht përgjatë viteve të fundit në nivelet mes 68-70 mijë tonë.
Të paktën pesë janë vendburimet kryesore ku Albetrol prodhon naftën. I pari vendburimi i Kuçovës. Mesatarisht shoqëria “Albpetrol” SH.A numëron rreth 950 puse në punë në këtë zonë dhe prodhimi për vitin 2024 në këtë rajon është 15.9 mijë tonë.
Vendburimi i dytë është ai i Patosit ku pjesa nën administrimin e shoqërisë “Albpetrol” SH.A numëron gjithsej 888 puse në inventar, prej të cilave 307 janë në ruajtje, pra, që nuk mund të kthehen më në prodhim. Sipas kompanisë janë rreth 22 puse të cilët mbahen si puse aktiv sot. Rreth 542 puse janë pjesë e fondit të ndalur dhe paraqesin vështirësi shumë të mëdha për t’u venë në punë. Gjatë 2024-ës prodhimi në këtë vendburim ishte 4147 tonë.
Vendburimi i tretë është Cakran – Mollaj ku gjithsej janë 63 puse në inventarin e këtij sektori, ndër të cilët 32 janë puse aktive për naftë e gaz. Prodhimi në këtë vendburim është 14 mijë tonë gjatë vitit 2024.
I katërti është vendburimi Gorisht – Kocul dhe vendburimi ka gjithsej 284 puse vertikale ne inventar, prej të cilëve 142 puse janë aktiv për naftë e gaz. Prodhimi në vitin 2024 në këtë vendburim ishte mbi 32.4 mijë tonë.
Vendburimi i fundit është ai i Amonicës ku aktualisht ka 59 puse në inventar nga të cilët vetëm 23 puse janë aktiv për naftë e gaz. Prodhimi në vitin 2024 ishte 3218 tonë./ N.Maho
Postimi ” Nafta, Albpetrol prodhoi mbi 70 mijë tonë në 2024-ën, kryeson Gorisht-Kocul ” eshte marre nga Revista Monitor.
