Nafta po qëndron në rritje të lehtë në sesionin e sotëm, pas disa ditësh me radhë në rënie, për shkak të ngadalësimit të kërkesës nga Kina, si pasojë e rritjes së infektimeve me Covid-19. Edhe raportimet se vendet e G7-ës do të vendosin një tavan më të lartë për çmimet e naftës ruse kanë ushtruar presion mbi çmimet. Nafta Brent e Londrës po tregtohet në rreth 85 dollarë për fuçi, ndërsa nafta Bruto amerikane po tregtohet në rreth 78 dollarë për fuçi.
Megjithatë, volumi i shkëmbimeve tregtare pritet të jetë i ulët edhe në tregun e naftës, për shkak të Ditës së Falenderimeve në SHBA. Të dyja kontratat pritet të publikojnë humbje prej rreth 2%, gjatë kësaj jave. Investitorët janë të shqetësuar për rritjen e infektimeve me Covid-19 në Kinë, që është importuesja më e madhe e naftës në botë. Analistët vlerësojnë se kërkesa nga ky vend ka rënë me rreth 1 milionë fuçi në ditë, në totalin e 13 milionë fuçive në ditë.
Ndërkohë, diplomatët e vendeve anëtare të G7-ës dhe Bashkimi Europian po diskutojnë vendosjen e një tavani prej 65 deri në 70 dollarë për fuçi për naftën ruse, me synimin për të limituar financimin e ofensivës ushtarake të Moskës në Ukrainë. Në anën tjetër, presidenti i Rusisë, Vladimir Putin, deklaroi se vendi i tij nuk do të shesë naftë ndaj vendeve që bëhen pjesë e marrëveshjes për vendosjen e këtij tavani.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
