Ndryshon buxheti i vitit 2025, me një Akt Normativ të miratuar rishtaz nga Këshilli i Ministrave më 11 Qershor.
Pas miratimit nga qeveria, Akti Normativ për disa ndryshime dhe shtesa në ligjin e buxhetit është botuar në Fletoren Zyrtare dhe hyn menjëherë në fuqi.
Me Aktin Normativ qeveria ka miratuar rritjen e fondit rezerve të buxhetit të shtetit, shtimin e fondit prej 10 mln USD për Garancinë Sovrane për bujqësinë dhe ka rialokuar fondet nga programi për mbështëtjen e fermerëve me naftë falas në grande për investimet e sektorit.
Pas ndryshimeve në Aktin Normativ, fondit të Garancisë Sovrane për mbulimin e kolateralit të kredive për bizneset dhe fermerët në bujqësi i shtohen edhe 1 miliardë lekë. Nga burime zyrtare mësohet se pas shtesës fondi për Garancinë Sovrane arrin në vlerën e 3 miliardë lekë, ku 2 miliardë lekë fonde janë të pashfrytëzuara, nga garancia e mëparshme sovrane.
“Shkronja “b”, e pikës 1, të nenit 19, ndryshohet, si më poshtë vijon: “b) për rritjen vjetore të garancive të qeverisjes qendrore në dobi të palëve të treta përfituese deri në 1 000 milionë lekë, duke përfshirë politikën e mbështetjes me garanci shtetërore të huas për bizneset në sektorin e bujqësisë”, citohet në ndryshimet e buxhetit.
Me Aktin Normativ janë miratuar edhe rialokim fondesh për programet e bujqësisë.
Fondet prej 537.8 milionë lekë, që ishin planifikuar për skemën e naftës falas në bujqësi në buxhetin e vitit 2025, është rialokuar pjesërisht për mbështetjen e fermerëve dhe agrobizneseve me grante për investime në bujqësi, blegtori apo agroindustri.
Edhe fondi deri në 700 milionë lekë në zërin “Shpenzime kapitale”, në programin “Menaxhimi i infrastrukturës së kullimit dhe ujitjes” të Ministrisë së Bujqësisë dhe Zhvillimit Rural pritet të akordohet me vendim të Këshillit të Ministrave për financimin e objekteve, pajisjeve dhe makinerive të infrastrukturës së ujitjes dhe kullimit, si dhe veprave të mbrojtjes nga përmbytja të bashkive.
Po ashtu sipas Aktit Normativ Nr. 6, datë 11.6.2025 fondi rezervë i buxhetit të shtetit nga 3 mld lekë arrin në 4,2 mld lekë. Për këtë ndryshim nga Këshilli i Ministrave sqarohet se dy fondet rezervë, fondi rezervë tradicional dhe fondi për Planin e Rritjes me Bashkimin Europian, janë bashkuar në një të përbashkët, me qëllim rritjen e fleksibilitetit financiar në mbështetje të projekteve strategjike të qeverisë.
Postimi ” Ndryshon buxheti 2025, rritet 10 mln USD fondi i Garancisë Sovrane për bujqësinë ” eshte marre nga Revista Monitor.
