Ledina Elezi/
Në gjysmën e parë të vitit janë kryer 72,418 aplikime për kredi nga individët dhe bizneset, 25% e të cilave u refuzuan nga bankat. Bankat kanë refuzuar më tepër kreditë e kërkuara nga individët, ndërsa si për bizneset e vogla dhe të mesme, ashtu edhe për ndërmarrjet e tjera, norma e refuzimit ka pësuar rënie.
Konkretisht, norma e refuzimit ka shënuar rritje duke rezultuar 2.7 pikë përqindje më e lartë se një vit më parë. Bankat me kapital të huaj në Shqipëri kanë refuzuar më shumë kredi se ato me kapital vendas.
Vihet re se gjatë periudhës, dy grupet bankare kanë shfaqur qëndrime të kundërta ndaj kërkesave për kredi të “bizneseve të vogla e të mesme” dhe ndaj kategorisë së “individëve”, pasi bankat vendase kanë shfaqur prirje lehtësuese duke refuzuar përkatësisht vetëm 4% dhe 6% të tyre, ndërkohë që bankat e huaja kanë rritur normën e refuzimit përkatësisht në 7% dhe 34%. Në të njëjtën kohë, të dy grupet e bankave duket se kanë preferenca të ngjashme ndaj bizneseve të mëdha, duke refuzuar vetëm 3% të kërkesave të tyre.
Numri total i aplikimeve për kredi të shqyrtuara nga bankat u rrit me 11.4% krahasuar me një vit më parë. Bizneset e vogla dhe të mesme kanë pasur një rritje më të lartë të kërkesës për kredi sesa individët. Pavarësisht kësaj rritjeje, 10% e aplikimeve për kredi i përkasin ndërmarrjeve dhe 90% i përkasin individëve.
Rreth 5.7% ose 4,093 aplikime janë realizuar nga ndërmarrjet e vogla dhe të mesme, ndërsa 3.6% ose 2,596 aplikime nga ndërmarrje të tjera. Nga ana tjetër, individët dominojnë me 65,729 aplikime gjithsej.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
