Rritja e pagave britanike, duke përjashtuar bonuset, ra në tremujorin e tretë në nivelin më të ulët në më shumë se dy vjet, duke rritur potencialisht besimin e Bankës së Anglisë (Bank of England, BoE) se presionet inflacioniste do të vazhdojnë të lehtësohen.
Të ardhurat mesatare javore, pa përfshirë bonuset, ishin 4.8% më të larta në tre muajt deri në fund të shtatorit se një vit më parë, nga 4.9% një muaj më parë dhe gati 8% një vit më parë, sipas Zyrës për Statistikat Kombëtare (Office for National Statistics, ONS).
Të dhënat e tremujorit të tretë ishin leximi më i dobët, që nga tre muajt deri në qershor 2022.
Sterlina ra në nivelin më të ulët kundrejt dollarit amerikan, që nga mesi i gushtit pasi u publikuan shifrat, duke rënë në pak mbi 1.28 dollarë.
Ekonomistët kishin parashikuar kryesisht rritje të rregullt të pagave prej 4.7%, por shifra ishte në përputhje me parashikimin e BoE për tremujorin e tretë, të publikuar javën e kaluar.
BoE uli normat e interesit të enjten e kaluar vetëm për herë të dytë, që nga viti 2020 dhe tha se reduktimet e ardhshme ka të ngjarë të jenë graduale, pasi parashikoi se buxheti i parë i qeverisë britanike do të çonte në inflacion më të lartë dhe rritje ekonomike.
Në buxhetin e saj të 30 tetorit, qeveria tha se do të rriste normën e kontributeve të sigurimeve shoqërore të paguara nga punëdhënësit me 1.2 pikë përqindjeje, duke shtuar 25 miliardë paund (32 miliardë dollarë) në vit në faturat e tyre të pagave.
BoE tha javën e kaluar se kjo dhe masa të tjera buxhetore ndoshta do të kontribuojnë në një rritje prej 0.5 pikë përqindje të normës së inflacionit, si dhe në do të prekin pagat, punësimin dhe fitimet, megjithëse ndikimi i saktë ishte i vështirë për t’u parashikuar.
Rritja e rregullt e pagave të sektorit privat – një masë kyçe e presionit inflacionist për BoE – ishte gjithashtu 4.8%, shifra më e lartë në tre muajt deri në shtator, siç kishte pritur banka qendrore.
Në një shenjë të mëtejshme të një lehtësimi të tregut të punës, numri i vendeve të lira të punës ra në nivelin më të ulët që nga maji 2021.
Duke u përshtatur për inflacionin e çmimeve të konsumit, pagat e rregullta u rritën me 2.7% në terma tremujorë, njësoj me tre muajt deri në gusht, por më dobët nga tremujori i parë.
Liz Kendall, sekretarja e punës dhe pensioneve, tha se rritja e pagave reale ishte inkurajuese, por se duhej bërë më shumë për të përmirësuar standardet e jetesës.
Shkalla e papunësisë në Britani u rrit në nivelin më të lartë në katër muaj prej 4.3% në tre muajt deri në shtator nga 4.1%, ndërsa numri i të punësuarve u rrit me 210,000, sipas të dhënave nga Anketa e Forcave të Punës, të cilat statisticienët e ONS thonë se duhet të trajtohen me kujdes.
Mungesa e aktivitetit në tregun e punës, një shqetësim i madh për qeverinë, ra me 0.4 pikë përqindjeje në nivelin më të ulët pesë-mujor prej 21.8% – rënia më e madhe tremujore që nga viti 2012, nëse merret në vlerë nominale.
BoE përsëriti mesazhin e saj javën e kaluar se mangësitë në AFP – që mat punësimin, papunësinë dhe pasivitetin, por jo pagat apo vendet e lira – e kishin bërë punën e saj shumë më të vështirë. Guvernatori Andrew Bailey tha se ishte e vështirë të thuhej, nëse rritja e pazakontë e pasivitetit të Britanisë ishte e vërtetë apo jo.
Bazuar në tregues të tjerë ekonomikë, banka qendrore vlerësoi se punësimi bazë është rritur me një normë tremujore prej rreth 0.2% gjatë këtij viti, duke përfshirë tremujorin e tretë. / Reuters
Postimi ” Pagat në MB rriten me ritmin më të ngadaltë në dy vjet, krijojnë kushtet për uljen e inflacionit ” eshte marre nga Revista Monitor.
