Parlamenti rrëzoi kërkesat e vazhdueshme të biznesit për rritjen e kapacitetit të lejuar për t’u instaluar të paneleve diellore për vetëprodhimin e energjisë elektrike. Ligji i ri “Për nxitjen e përdorimit të energjisë nga burimet e rinovueshme” u miratua në seancën e fundit plenare, teksa varianti final që u dërgua për votim nga komisionet parlamentare lejon instalimin e jo më shumë se 0.5 MW.
Prej kohësh kërkohej që kjo sasi të mos kishte limite, teksa një propozim i hedhur së fundmi nga grupet e interesit në Komisionin e Veprimtarive Prodhuese ishte që të paktën të rritej në 1 MW. Ndërkaq, ligji i ri sjellë një sërë risish për sektorin elektroenergjetik shqiptar. Një prej tyre lidhet me skemën e matjes për vetëprodhuesit e energjisë, që tashmë do të jetë mujore dhe jo vjetore.
Aplikimi i kësaj skeme ka kohë që kërkohet nga bizneset dhe grupet e interesit, teksa viti që lamë pas shënoi një kërkesë në rritje për instalimin e këtyre impianteve, si pasojë e çmimeve tejet të larta e të papërballueshme të energjisë elektrike.
Po ashtu, sipas ligjit të ri prodhuesit e energjisë elektrike nga burime të rinovueshme, sikurse është dielli, era apo uji mund të bashkohen me njëri-tjetrin, duke krijuar “kooperativa energjetike”. Sipas dokumentit, një komunitet i energjisë së rinovueshme ka të drejtë jo vetëm të prodhojë, por edhe të konsumojë, të depozitojë, të ndajë, të shesë energji të rinovueshme dhe të ofrojë agregim, duke përfshirë edhe marrëveshjet e shitblerjes së energjisë.
Po ashtu, për herë të parë, banorët e një pallati do të kenë të drejtë të bashkohen e të instalojnë panele diellore për prodhimin e energjisë për nevoja autokosumatore. Kjo pasi, në ligj është përfshirë koncepti i “vetëprodhuesit të burimeve të rinovueshme me veprim të përbashkët”, që është një grup prej të paktën dy vetëprodhuesish të burimeve të rinovueshme që veprojnë së bashku, të cilët ndodhen në të njëjtën ndërtesë ose bllok me shumë apartamente.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
