Hera e parë në tre vjet, që inflacioni bie nën objektivin e Bankës së Anglisë. Kjo hap dyert për më shumë ulje të normave këtë vit.
Inflacioni në Mbretërinë e Bashkuar ra më shumë se sa pritej, në nivelin më të ulët të tre viteve prej 1.7 % në shtator, duke bërë që paundi të bjerë dhe tregtarët të rrisin pritshmëritë për ulje të mëtejshme të normave nga Banka e Anglisë (BoE) këtë vit.
Publikimi i të dhënave të së mërkurës nga Zyra për Statistikat Kombëtare, tregon se inflacioni është rikthyer nën objektivin prej 2% të BoE, për herë të parë që nga prilli 2021.
Rritja vjetore e çmimeve të konsumit është më pak se vlera e parashikuar 1.9%, në një sondazh të Reuters dhe krahasohet me shifrën e gushtit prej 2.2%. Tërheqja u nxit nga çmimet më të ulëta të fluturimeve dhe benzina.
Shifrat do të shërbejnë si një nxitje për qeverinë e Sir Keir Starmer, vetëm dy javë përpara përcaktimit të buxhetit të ri me rritje të mëdha të taksave. Kancelarja Rachel Reeves po kërkon të zgjidhë një mungesë financimi prej 40 miliardë paund.
Numrat i shtynë investitorët të rrisin parashikimet se BoE do të ulë normat e interesit për herë të dytë në takimin e nëntorit, pas uljes në gusht dhe më pas do të bëjë një ulje shtesë në dhjetor.
Rendimenti i obligacioneve dyvjeçare të qeverisë së Mbretërisë së Bashkuar, të cilat janë të ndjeshme ndaj ndryshimeve të normave të interesit, ra me 0,09 pikë përqindje në 4,04%.
Guvernatori Andrew Bailey tha kohët e fundit se përcaktuesit e normave mund të jenë “pak më agresivë” në uljen e kostove të huamarrjes, nëse inflacioni vazhdon të bjerë. Komentet u panë nga investitorët si një sinjal se BoE ishte gati të ulte normat në takimet në nëntor dhe dhjetor.
Inflacioni bazë ishte 3.2 %, më i ulët se pritshmëritë e ekonomistëve prej 3.4%, ndërsa norma e inflacionit të shërbimeve ra nga 5.6% në 4.9%, nxitur nga rritja më e ulët e çmimit të biletave ajrore.
Inflacioni i shërbimeve shihet nga banka qendrore si një matës kryesor i presioneve themelore të çmimeve. Leximi prej 4.9 % ishte shumë më i ulët se parashikimi prej 5.5% i publikuar nga BoE, kur publikoi për herë të fundit një vlerësim të plotë të ekonomisë në gusht.
Ndërkohë rritja e pagave në Mbretërinë e Bashkuar ra në 4.9% në tre muajt deri në gusht, nga 5.1% në tre muajt deri në korrik.
Një përshpejtim në ciklin e uljes së normave është i mundur, edhe pse inflacioni total ka të ngjarë të kthehet drejt 2.5% më vonë këtë vit, pasi rënia nga çmimet më të ulëta të energjisë zbehet.
Darren Jones, kryesekretari i Thesarit, tha se shifrat e inflacionit do të ishin “lajm i mirëpritur për miliona familje”, duke shtuar se “ka ende më shumë për të bërë për të mbrojtur njerëzit që punojnë”.
Megjithatë, rënia e mprehtë e inflacionit do të godasë shumë familje me të ardhura më të ulëta, duke pasur parasysh se shifra prej 1.7% e shtatorit, do të përdoret për të ri-llogaritur përfitimet e moshës së punës pranverën e ardhshme. / FT
Postimi ” Paundi ulet ndërsa inflacioni në Mbretërinë e Bashkuar bie më shumë se sa pritej në 1.7% ” eshte marre nga Revista Monitor.
