Pavarësisht se prej disa ditësh mijera hektarë tokë u përmbytën kryesisht në qarkun e Shkodrës dhe të Lezhës, duket se situata ka kaluar pa dëme. Disa ditë pas tërheqjes së ujit kur dhe bëhen vlerësimet për dëmet e shkaktuara, burime zyrtare nga Ministria e Bujqësisë, shprehen për ScanTv se nuk janë raportuar dëme në të mbjella apo në bagëti.
Megjithatë, edhe pse përmbytjet kanë ndodhur dy javë më parë dhe siituata është qetësuar tërësisht, ende nuk është bërë një dekaratë shteruese nga institucionet kompetente mbi pasojat reale të kësaj situate.
Dhe kjo nuk është hera e parë që mungon një bilanc i tillë, pasi edhe në rastet e tjera kur vendi është prekur nga fatkeqësitë natyrore, qeveria nuk ka nxjerrë një faturë të plotë të dëmeve apo të dëmshpërblimeve të dhëna, në rastet kur ka pasur të tilla.
Sipas të dhënave të INSTAT, të kalkuluara nga sa i takon sipërfaqja e mbjellë me bimë të arave, Shkodra dhe Lezha zënë së bashku afro 57.7 mijë hektarë apo 13.7% të sipërfaqës totale. Qarku i Shkodrës është i njohur gjithashtu si më i rëndësishmi për kultivimin e bimëve aromatiko-mjekësore, ndërsa zë vendin e tretë në vend për rendimentin më të lartë në prodhimin e misrit pas Vlorës dhe Fierit, me 72.1 kv/ha. Sipas një raporti më të fundit të Bankës Botërore, përmbytjet zënë peshën më të madhe ndër katastrofat natyre nga të cilat preket Shqipëri me afro 38 %.
Humbjet mesatare vjetore për shkak të fatkeqësive janë rreth 2.5 për qind e PBB-së, ku vetëm nga përmbytjet dëmet llogariten mesatarisht 48 milionë dollarë në vit. Këto vlerësime mbulojnë asetet e sektorit privat, por jo ato publik.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
