Qeveria planifikon të rrisë thuajse me 10-fish numrin e pronarëve që pranojnë formën e kompensimit me kusht, e cila parashikon heqjen dorë nga deri 80% e vlerës financiare që u garanton ligji, në këmbim të marrjes jashtë radhe të pjesës së mbetur prej 20%. Scan Televizion ka zbardhur planet buxhetore afatmesme të Qeverisë, e cila parashikon që numri i tyre të shkojnë në 2130 brenda vitit 2026.
Skema e kompensimit me kusht aplikohet që në vitin 2016. Që prej atij viti, janë në total 269 subjekte që kanë pranuar të heqin dorë nga pjesa më e madhe e kompensimit në këmbim të marrjes së tij jashtë radhe. Në total për këta subjekte janë paguar me këste rreth 1.7 miliardë lekë, apo afërisht 17 milionë dollarë. Vlen për t’u përmendur, se ATP raporton që i ka kursyer buxhetit më shumë se 6.8 miliardë lekë, apo afërisht 68 milionë dollarë përmes kësaj formule.
Është një formulë e kontestuar me forcë nga shoqatat e pronarëve, por nga e cila Qeveria pret të kursejë shumë para. Në dokumentin zyrtar të zbardhur nga Scan, theksohet se Qeveria pret që brenda vitit 2024 të përfshihen në këtë skemë kompensimi 1760 pronarë. Ndërkohë që në terma afatmesme, deri në vitin 2026, Qeveria pret të heqin dorë nga pjesa dërrmuese e kompensimit thuajse dhjetëfishi i numrit aktual, plot 2130 pronarë.
Në rast se kursimi i fondeve të Qeverisë për 269 subjekte arrin aktualisht në rreth 68 milionë dollarë, për 2130 subjekte, shifrat do të ishin shumë të lartë. Sipas vlerësimeve aktuale të Qeverisë, fatura totale e kompensimit arrin në rreth 1 miliardë dollarë. Shumëfishimi i mumrit të pronarëve që pranojnë të përfshihen në këtë formule do ta zbuste ndjeshëm faturën për arkën e shtetit.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
