Në muajin prill Ministria e Financave dhe Ekonomisë (MFE) zhvilloi tetë ankande letrash me vlerë, duke ofruar 30 miliardë lekë në total, prej të cilave 16.0 miliardë lekë bono thesari dhe 14.0 miliardë lekë obligacione. Ndërkohë që edhe më e lartë do të jetë huamarrja e brendëshme për muajin maj, i cili do të mbyllet me një total prej 33 miliardë lekësh, apo afërisht 320 milionë euro.
Një nivel kaq i lartë huamarrjeje lidhet edhe me sjelljen e blerësve të cilët po ulin vazhdimisht kostot e borxhit qeveritar. Bonot me afat maturimi 12 mujor regjistruan një yield mesatar prej 3.56% në mesin e majit. Rënia është ndjeshme krahasuar me ankandin e fillimit të majit, kur yeldi mesatar i ponderuar ishte ishte 3.75%, por shumë më e thellë po të shohim normat e regjistruara në fillim të vitit, të cilat shkonin mbi 5%.
Shkaku kryesor i rënies është kërkesa shumë e lartë për investimet në bono thesari, veccanërisht nga individët, prania e të cilëve vijon të mbetet shumë e lartë.
Rënia e yield-eve, e nisur fillimisht tek bonot 12-mujore në muajin dhjetor të vitit të kaluar, është forcuar dhe është shtrirë më pas tek të gjitha maturitetet. Diferencat e yield-it të bonove me normën bazë dhe ajo mes yield-eve maksimale dhe minimale të regjistruara në ankande janë ngushtuar, duke konfirmuar kështu presionet rënëse.
Edhe yield-et e obligacioneve kanë shfaqur ecuri të njëjtë me bonot në këtë periudhë, ku uljet e realizuara tek maturitetet afatgjata kanë rezultuar shpesh më të forta se ato të bonove të thesarit. Yield-i i obligacionit 2-vjeçar shënoi 4.3% në muajin prill, nga 5.8% në muajin janar, ndërkohë që yield-et e obligacioneve 5, 7, 10, dhe 15-vjeçare u ulën mesatarisht me 2 pikë përqindjeje nga ankandet e fundit respektive.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
