Qeveria shqiptare ka nënshkruar me Bankën Evropiane për Rindërtim dhe Zhvillim (BERZH) një Marrëveshje Garancie, qëllimi i së cilës është garantimi i të gjitha detyrimeve që Operatori i Shpërndarjes së Energjisë Elektrike (OSHEE) merr përsipër në kuadër të Marrëveshjes së Huasë me BERZH-in për “Projektin e Qëndrueshmërisë së OSHEE-së”.
Sipas njoftimit, marrëveshja do të garantojë sigurimin e një huaje afatgjatë me kushte të favorshme, në vlerën 45.75 milionë euro (45,750,000 Euro), e cila synon të rifinancojë kreditë ekzistuese overdraft, me garanci shtetërore, marrë nga bankat e nivelit të dytë në periudhën e krizës energjetike në vend.
Për qeverinë shqiptare, Marrëveshja u nënshkrua nga Ministri i Financave, z. Petrit Malaj dhe Administratori i OSHEE, z. Enea Karakaçi, ndërsa për BERZH-in nga Zëvendës Presidenti i saj, z. Matteo Patrone, gjatë vizitës së tij në vendin tonë.
Ministri Malaj vlerësoi nënshkrimin e Marrëveshjes dhe mbështetjen e vazhdueshme që Banka Europiane për Rindërtim dhe Zhvillim ka dhënë për vendin tonë ndër vite.
“Ky transaksion ofron avantazhe të konsiderueshme. Duke rifinancuar huatë aktuale afatshkurtra në huatë afatgjata nga BERZH, ai mundëson që OSHEE të kthejë kryesimin në këste të menaxhueshme për një periudhë të zgjatur, duke krijuar një profil më të qetë të amortizimit dhe duke reduktuar rrezikun e rifinancimit të borxhit në të ardhmen. Për më tepër, ai ofron kushte financiare më të favorshme, duke çuar në uljen e kostos totale të huasë”, u shpreh z. Malaj.
Nga ana e tij, z. Patrone shprehu kënaqësinë në emër të BERZH për mbështetjen e qëllimeve të modernizimit dhe qëndrueshmërisë së OSHEE-së. “Duke zhbllokuar kapitalin për investime të gjelbra, ne nuk po forcojmë vetëm infrastrukturën e kompanisë, por po hapim gjithashtu rrugën për një të ardhme energjetike më të qëndrueshme për kompaninë dhe qytetarët e Shqipërisë”, u shpreh z. Patrone.
Administratori i OSHEE-së, z. Karakaçi theksoi rëndësinë e projektit në fjalë për OSHEE dhe sektorin e energjisë në Shqipëri në përgjithësi. “Ai do të na mundësojë të vazhdojmë përmirësimin dhe modernizimin e shërbimit që ofrojmë për klientët tanë dhe të përmirësojmë besueshmërinë e atij shërbimi, me qëllimin përfundimtar për të siguruar energji të qëndrueshme me çmime të arsyeshme”, tha z. Karakaçi.
Me anë të Marrëveshjes së nënshkruar me BERZH, OSHEE do të forcojë stabilitetin e saj financiar dhe optimizojë strukturën e borxhit, duke siguruar burime financimi më pak të kushtueshme dhe më të qëndrueshme, për të mundësuar financimin e shpenzimeve të rëndësishme kapitale të gjelbërta e të rëndësishme, në zhvillimin, menaxhimin dhe efiçencën e rrjetit shpërndarës të energjisë elektrike në Shqipëri.
Nisma është pjesë e angazhimit të Qeverisë Shqiptare dhe BERZH-it për të mbështetur sektorin energjetik dhe për të garantuar një menaxhim më efikas të burimeve financiare, duke rritur qëndrueshmërinë operacionale të OSHEE GROUP dhe përmirësuar shërbimet ndaj qytetarëve.
Postimi ” Qeveria Shqiptare, marrëveshje me BERZH, garanci 47.5 mln euro për energjinë ” eshte marre nga Revista Monitor.
