Gjatë tremujorit të dytë Qeveria ka shtuar ndjeshëm huamarrjen në tregun e brendshëm, por në të kundërt të trendit të muajve të mëparshëm, individët nuk kanë qenë aktivë në blerjen e letrave me vlerë. Sipas të dhënave zyrtare, huamarrja në tregun e brendshëm të titujve të qeverisë u shtua me rreth 21 miliardë lekë në tremujorin e dytë, nga 12.7 miliardë lekë në tremujorin e parë.
Shtesa në huamarrje në tremujorin e dytë, ndryshe nga i pari, konsistoi vetëm në instrumente afatgjatë. Rreth 83% e shtesës së huamarrjes në tremujorin e dytë u financua nga bankat tregtare. Individët nuk shfaqën interes të shtuar për të investuar në tituj qeveritarë këtë tremujor, duke blerë vetëm 10% të shtesës së borxhit të brendshëm, nga 80% që rezultoi në tremujorin e parë.
Normat e interesit të letrave me vlerë të Qeverisë kanë shënuar nivele shumë të ulëta, fare pranë kufirit prej 3%, të normës bazë të vendosur që në fillim të këtij viti nga Banka e Shqipërisë. Në ankandin e mesit të gushtit bonot me maturim 12-mujor janë shitur me normën mesatare 3.16, një rritje e papërfishme nga norma 3.13% e shënuar në ankandin e mëparshëm.
Duket se rënia e interesit për të investuar në letra me vlerë të Qeverisë është edhe faktori kryesor i normave kaq të ulëta. Në ankandet e fundit vërehet se shuma e vënë në dispozicion nga investitorët për të blerë bono është thuasje sa shuma e shpallur nga Qeveria, në një kohë që muajt e mëparshëm kërkesa për këtë lloj investimi ka qenë shumë e lartë.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
