Qeveria sërish ka siguruar borxh me interes të ulët në tregun e brendshëm. Në ankandin e fundit të bonove të thesarit me afat maturimi 12-mujor u blenë 8,5 miliardë lekë, me një yield mesatar të ponderuar prej 3,65%. Kërkesa për blerje dhe pjesëmarrja e investitorëve në këtë ankand ishte më e lartë se shuma e shpallur nga qeveria, duke arritur në rreth 8,558 miliardë lekë.
Ndonëse me një rritje të lehtë nga ankandet e mëparshëm, interesi i bonove 12-mujore po tenton të ringrihet pasi arriti në qershor të vitit të kaluar një minimum prej 3,06%. Pas rritjes së normës bazë të interesit nga ana e Bankës së Shqipërisë në muajin nëntor në 3,25%, yieldet e bonove të thesarit tentuan ringritjen që gjithsesi deri më sot mbetet nën nivelin e fillimvitit të kaluar kur u regjistrua në 5,34%.
Në tre muajt e ardhshëm, prill, maj dhe qershor është planifikuar realizimi i 22 ankande bonosh dhe obligacionesh, ku në total do të emetohen 105,5 miliardë lekë. Gjatë këtij viti është parashikuar që borxhi publik do të merret në masën më të madhe në tregun e brendshëm, në formën e bonove të thesarit e obligacioneve. Referuar planit vjetor të huamarrjes, totali i emetimeve për 2024-ën pritet të jetë rreth 378.64 miliardë lekë.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
