Lehtësim i burokracive në marrëdhënien me institucionet publike, ishte lajmi që Edi Rama kishte për përfaqësuesit e biznesit, që kishte thirrur në një takim. Kryeministri foli për një rishikim të procedurave administrative dhe shkurtim të hallkave burokratike që sipas tij do të përmirësojnë klimën e biznesit, ndërsa sipërmarrësit sollën shqetësimet e tyre. Problem kryesor për ndërtuesit ishte çmimi i ri i referencës, ndërsa Rama jo vetëm nuk u tërhoq, por lajmëroi se do të prekë edhe hotelet.
“Çmimi i referencës që ka një objektiv nuk kemi asnjë kundërshtim, por ne kundërshtojmë dyfishimin në mes të një viti. Me këtë ndryshim referencë ne paguajmë 150 euro më shumë dhe kjo të falimenton”.
“Ju kishit bërë një plan biznesi që ta shisni me 2000 mijë euro dhe deklaroni me 800 euro. Plan biznes e kishit edhe evazionin. Çmimet e referencës nuk janë arbitrare, por janë vendosur në bazë të tregut. Edhe hotelet duhet të përgatiten që vitin e ardhshëm të kenë referencë”, tha Rama.
As kërkesa për të shfuqizuar takën 3% të strehimit social nuk u mirëprit nga Rama.
“Pse duhet të mendojmë vetëm ne për të pastrehët?”, u shpreh një ndërtues.
“Mos hajdeni këtu dhe bëni si shtresë në nevojë. Askush nuk ju detyron të ndërtoni me zor, sepse ju keni interes dhe fitoni shumë dhe bravo ju qoftë. E kam folur me Bashkinë e Tiranës 3% për strehimin social të jepet aty ku ndërtoni. Unë thashë se do më thoni pse s’na e merrni 3% te blloku por tek Astiri, ju thoni fare, kjo nuk diskutohet”, iu përgjigj Rama.
Dhomat e Tregtisë Amerikane dhe Franceze pohuan se asgjë nuk ndryshon për të zgjidhur shqetësimet e paraqitura prej tyre. Dhoma Amerikane:
“Shqetësimi kryesor është mungesa e besimit. Rekomandimet tona nuk kanë marrë përgjigje”, tha Dhoma Amerikane e Tregtisë.
“Institucionet na dëgjojnë por nuk na zgjidhin gjë”, u shpreh Dhoma e Tregtisë Francë-Shqipëri.
Shef i Konfindustrisë evidentoi parregullsi tek shitja e karburanteve me pakicë. Ankesat për shitjen me pakicë të karburanteve me pakicë.
“Ka patur vjedhje të mëdha”, deklaroi Buxhuku.
Edhe për prokurimet publike kishte ankesa nga bizneset, por kryeministri Rama tha se për këtë po punon vetë qeveria dhe brenda këtij mandati me ndihmën e inteligjencës artificiale do t’i jepet fund abuzimeve.
Burimi: A2 CNN
