Ecuria e aktiveve likuide në valutë është një tjetër element që dëshmon flukset shumë të larta të eurove në sistemin bankar gjatë këtij viti. Aktive likuide quhen ato aktive që janë ose shndërrohen në para’, në një afat shumë të shkurtër pa ndryshuar, ose duke e ndryshuar në madhësi të papërfillshme koston e tyre fillestare, ku përfshihen kartmonedhat, çeqet, apo depozitat pa afat.
Sipas të dhënave zyrtare të Bankës së Shqipërisë, duke iu referuar treguesit të aktive likuide në valutë ndaj detyrimeve afatshkurtra në valutë në në nivel sektori, konstatohet se ai është rritur gjatë periudhës me 1.5 pikë përqindje, duke u ngjitur në nivelin 28.7% në fund të qershorit 2023. Krahasuar me një vit më parë, treguesi është rritur me 2.7 pikë përqindje.
Sipas elementeve përbërëse të raportit, vërehet se gjatë gjashtëmujorit, aktivet likuide në valutë janë rritur me 4.9%, ndërsa detyrimet afatshkurtra në valutë kanë rënë lehtë me 0.4%. Sipas bankave, aktivet likuide kanë ndryshuar në intervalin [-12%] deri në 32.4%. Në krahasim me një vit më parë, aktivet likuide janë rritur me ritme më të larta se detyrimet afatshkurtra, përkatësisht 15.3% kundrejt 4.4%.
Shpërndarja e vlerave të treguesit për valutën sipas bankave të sektorit vijon të reflektojë një shpërndarje relativisht të gjerë. Për 3 prej bankave, vlerat e treguesit kanë pësuar rënie dhe 3 banka kanë vlerën e raportit më të lartë se vlera mesatare e sektorit.
Rritje të ngjashmë kanë shënuar edhe depozitat në valutë, veçanërisht ato në euro. Banka e Shqipërisë raporton edhe për gjashtëmujorin e këtij viti rritje dyshifrore të depozitave në valutë.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
