Enti Rregullator i Ujit ka nisur procedurat për shqyrtimin e aplikimeve për rritjen e tarifave të ujit dhe kanalizimeve në 13 qytete. Sipas vendimeve të marra nga Komisioni Rregullator në proces janë 3 shoqëri rajonale, që mbulojnë me shërbim 12 qytete dhe shoqëria e ujësjellës – kanalizime Vlorë.
Më konkretisht, bëhet fjalë për shoqërinë rajonale Durrës që përfshin edhe Krujën, Shijakun, Kavajën dhe Rrogozhinën, atë të Fierit ku bën pjesë edhe Patosi, Roskoveci dhe Mallakastra, dhe për shoqërinë rajonale Lezhë, që përfshin edhe Mirditën e Kurbini.
Referuar vendimeve të ERRU-së shoqëria rajonale Durrës ka dorëzuar të plotë dokumentacionin e nevojshëm, ndërkohë që shoqëritë e tjera duhet të plotësojnë dosjen e aplikimit, pasi në të kundërt kërkesa për rritje tarifash do të refuzohet.
Aplikimi për rritje të tarifave të shërbimit ishte i pritshëm pas reformës të ndërmarrë në sektor vitin që shkoi, duke qenë se një nga objektivat e saj ishte përmirësimi i qëndrueshmërisë financiare për shoqëritë UK, duke përfshirë ndër të tjera harmonizim gradual të çmimeve në zonën e shërbimit.
Referuar procedurës, është Enti Rregullator i Ujit që merr vendimin final për pranimin apo refuzimin e kërkesave të bëra nga shoqëritë apo mbi nivelin tarfior që do të aplikohet për abonentët.
Ndërkaq, pak javë më parë Enti rrëzoi kërkesën e 3 shoqërive rajonale për rritjen e tarifave të ujit. Shoqëritë e Shkodrës, Beratit dhe Elbasanit, që mbulojnë një total prej 16 qytetesh aplikuan së fundmi pranë ERRU për ndryshim tarifash, por kërkesa e tyre u rrëzua për shkak të mospërmbushjes së kritereve.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
