Bujqësia është sektori më i rëndësishëm i ekonomisë që kontribuon në nivelin 20 % të Prodhimit të Brendshëm Bruto dhe mbi 40 për qind në punësim. Por nga ana tjetër, është një sektor që ka qenë i nënfinancuar ndër vite.
ScanTv ka bërë një analizë të fondeve që janë dhënë për zhvillimin rural në 5 vitet e fundit, zë ku përfshihen subvencionet direkte të akorduara për fermerët dhe rezulton se pavarësisht se fondet kanë ardhur në rritje progresi nga viti në vit, sërish mbeten në nivele shumë të ulëta në raport me nevojën që ka ky sektor.
Kështu, referuar akteve të fundit normative të ndryshime në buxhet, rezulton së në vitin 2020 për zhvillimin rural janë vendosur në dispozicion në total 3.7 miliardë lekë, ndërsa vetëm për subvencionet kanë shkuar afro 1.1 miliardë lekë.
Financimi për këtë zë është rritur në 5 miliardë lekë në 2021, por subvencionet kanë mbetur në vend numër. Në 2022 u akorduan 7 miliardë lekë dhe për herë të parë mbështetja për fermerët arriti rekord në 5.1 miliardë lekë, për shkak edhe të reformës për kultivimin e grurit.
Këtë vit, fondi për zhvillimin rural i arriti nivelin e 10.5 miliardë lekëve nga 8.7 të planifikuara në fillimvit për shkak të numrit të lartë të aplikimeve në skemat kombëtare dhe skemën e naftës falas në bujqësi, ku shumë fermerë mbetën jashtë vijës së financimit për shkak të mungesës së parave’.
Me aktin normativ të 18 tetorit, qeveria shtoi edhe 1.8 miliardë lekë për këtë qëllim. Në total për subvencione u përdorën 3.1 miliardë dhe për skemën e naftës 2 miliardë lekë, ku deri më tani kanë përfituar naftë falas për punime të mekanizuara në bujqësi mbi 34 mijë fermerë.
Ndërsa në projektbuxhetin e vitit 2024 duket se ka regres në financimin e bujqësisë. Fondet e planifikuara për zhvillimin rural janë afro 7.2 miliardë lekë , apo 3.3 miliardë lekë më pak se ky vit, çka do të bëjë që edhe mbështetja e skemës kombëtare të subvencioneve të jetë sërish e ulët.
Në kushtet kur edhe programi IPARD është ngrirë, do të jetë shumë e vështirë për sektorin që të ecë përpara në mungesë të fondeve të nevojshme.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
