Viti 2022 ishte viti i rritjes së çmimeve, ku ndër produktet që preku më së shumti qytetarët shqiptarë ishin karburantet. Çmimi i naftës arriti në nivelin historik të 265 lekë/l si pasojë e tronditjeve të tregjeve ndërkombëtare nga lufta Rusi-Ukrainë dhe luhatjeve të vazhdueshme në bursë.
Një ndër taksat më të diskutuara që llogaritet në çmimin e naftës dhe benzinës ka qenë edhe taksa e karbonit, ku ka pasur edhe sugjerime të vazhdueshme për heqjen e saj për një periudhë kohe deri në stabilizimin e tregjeve.
Por sa kanë qenë të ardhurat e mbledhura nga administrata tatimore nga kjo taksë përgjatë vitit që lamë pas? Të dhënat zyrtare të analizuara nga ScanTv, tregojnë se qytetarët shqiptarë kanë paguar në vitin 2022 20.2 milionë euro taksë karboni mbi karburantet. Por krahasuar me vitin 2021, kanë paguar 5.9 milionë euro më pak. Sipas legjislacionit në fuqi, taksa e karbonit aplikohet në vlerën 1.5 lekë/litër për benzinën dhe 3 lekë/litër për naftën.
Po ashtu, një taksë tjetër që tregon ecurinë e konsumit dhe që ka më shumë peshë në të ardhurat buxhetore është ajo mbi qarkullimin e cila aplikohet në masën 27 lekë/l. Në vitin 2022 nga kjo taksë u arkëtuan 162.4 milionë euro, duke regjistruar rënie me rreth 7.4 për qind krahasuar me një vit më parë. Pra në total nga këto dy taksa janë paguar 183.3 milionë euro.
Duke qenë se të dyja këto taksa që mblidhen nga buxheti i shtetit aplikohen litër dhe jo për çmim të produktit, të dhënat e tatimeve tregojnë për një rënie të konsumit të naftës dhe benzinës në sasi gjatë viti të krizës së çmimeve. Duke qenë se taksa e qarkullimit është e njëjtë për të dyja produktet, rënia e konsumit konsiderohet në 7.4 për qind.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
