Qytetarët shqiptarë konsumojnë mesatarisht 3300 ton cigare në një vit, sasi në të cilën përfshihet duhan i kultivuar apo i hapur dhe cigaret që shihen ne paketa. Por cila është pesha që zë duhani i kultivuar në konsum? Sipas të dhënave nga Ministria e Financave, duhani i hapur vendi dhe importi, zë vetëm 4 për qind të sasisë së cigareve. Pra e thënë ndryshe vetëm 150 ton konsumohen si duhan i dredhur në të gjithë vendin.
Dhe sërish kjo sasi ndahet midis asaj që kultivohet nga fermerët dhe çfarë vjen nga jashtë, ku 1/3 është prodhim vendin dhe 2/3 import. Megjithatë duhani gjethe konsiderohet si shqetësim kryesor sa i takon pjesës ilegale të konsumit dhe për këtë kërkohet miratimi i një ligji që bën formalizmin e gjithë industrisë. Ndërsa nga Ministria e Financave bëhet me dije se aktualisht nuk ka një iniciativë të tillë, për shkak se edhe pesha që zë duhani i hapur në konsum është e ulët.
“Duhani gjethe është ndër burimet kryesore të pjesës ilegale të konsumit të duhanit. Shqipëria është pak më mbrapa se vendet e tjera përsa i përket rregullimit të kultivimit të duhanit, i cili është shkak për kontrabandën. Nëse ky legjislacion miratohet , atëherë bashkëpunimi me të gjithë institucionet shqiptare do të japë rezultatet e veta. Kjo është pjesë e formalizimit të ekonomisë në Shqipëria. Tregtia informale është e vështirë të matet. Formalizimi është hap i domosdoshëm dhe qeveria shqiptare i ka dhënë sinjalet që ka vullnet për ta ndryshuar këtë lidh ne po presim”
Ndërsa miratimi i kalendarit të akcizës vlerësohet si një hap pozitiv për parashikueshmërinë e të ardhurave buxhetore. Ndryshimet ligjore në ligjin për akcizat parashikojnë rritje progresive të akcizës mbi duhanin deri në vitin 2026. Gjatë vitit 2022 të ardhurat në buxhet nga akciza e duhanit ishin rreth 28.3 miliardë lekë, duke u listuar si zëri i dytë me peshën më të madhe në të ardhurat totale doganore, pas karburanteve.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
