Ndonëse pasiguria në kontekstin botëror mbetet e lartë, Banka e Shqipërisë do të kushtëzojë vendimet lidhur me politikën monetare nga informacionet e reja dhe do të jenë gjithnjë në përputhje me objektivin e stabilitetit të çmimeve, si dhe konsistente me kahun e politikës fiskale dhe ecurinë e kursit të këmbimit.
Deklarata u bë nga guvernatori i Bankës së Shqipërisë, gent Sejko, i cili priti në takim përfaqësues të Bankës Botërore (BB), z. Richard Record, Përfaqësues i përkohshëm rezident i Zyrës së BB-së në Shqipëri dhe z. Massimiliano Paolucci, Përfaqësuesi i ri i Zyrës së BB-së në Shqipëri.
Sipas njoftimit zyrtar, në krye të takimit, Guvernatori Sejko i përcolli përfaqësuesve të BB-së një falënderim të veçantë për asistencën teknike të ofruar ndër vite nga Banka Botërore për Bankën e Shqipërisë, kryesisht në fushat e mbikëqyrjes bankare, sistemeve të pagesave dhe edukimit financiar si dhe i uroi mirëseardhjen Përfaqësuesit të ri të BB-së z. Paolucci.
Në vijim, Guvernatori Sejko prezantoi panoramën ekonomike të vendit, duke u shprehur se ekonomia shqiptare dhe treguesit kryesorë të stabilitetit ekonomik, monetar e financiar të saj, janë në një trend pozitiv zhvillimi. Lidhur me aktivitetin ekonomik, Guvernatori u shpreh se inflacioni është në nivele të ulëta, ndërsa tregjet financiare kanë qenë të qeta dhe kreditimi për sektorin privat ka shënuar rritje.
Z. Paolucci vlerësoi politikën monetare të ndjekur nga Banka e Shqipërisë si një kontribut të rëndësishëm në ecurinë pozitive të ekonomisë së vendit. Ai shprehu vlerësimet për Bankën e Shqipërisë lidhur me menaxhimin e raportit të kredive me probleme, i cili ka shënuar nivelet minimale të më shumë se një dekade nga 25% në vitin 2014, në 4% në 2025.
Në kuadër të stabilitetit financiar e ekonomik të vendit, z. Paolucci vlerësoi reformat e ndërmarra nga Banka e Shqipërisë në drejtim të ruajtjes së stabilitetit financiar në vend dhe stabilitetit të çmimeve.
Një tjetër çështje e trajtuar gjatë takimit ishte dhe modernizimi i sistemeve të pagesave në Shqipëri, si një hap i rëndësishëm drejt forcimit të integrimit financiar të vendit me tregun evropian.
Guvernatori u shpreh se Banka e Shqipërisë, me asistencën e Bankës Botërore, ka ndërmarrë hapa konkretë për të harmonizuar kuadrin rregullator me standardet evropiane, duke u anëtarësuar me sukses në Tregun Unik të Pagesave në Euro (SEPA), ku transaksionet e para ndërkufitare SEPA pritet të realizohen në fillim të muajit tetor 2025.
Ai theksoi se Banka e Shqipërisë gjithashtu po bashkëpunon ngushtë me Bankën Botërore dhe Bankën e Italisë për të implementuar një sistem pagesash të shpejta (Instant Payment) që është kloni i sistemit TIPS, sistemi evropian i pagesave të shpejta, për të ofruar pagesa të shpejta që kryhen në kohë reale, me një siguri më të lartë dhe kosto më të ulët për qytetarët.
Së fundmi, z. Paolucci përgëzoi Bankën e Shqipërisë për punën e realizuar për anëtarësimin e suksesshëm të vendit në SEPA. Përtej përfitimeve për qytetarët, bizneset dhe ekonominë në tërësi, ky anëtarësim krijon parakushtet e nevojshme për përgatitjen e Shqipërisë për integrimin e plotë në BE.
Palët ranë dakord që të vijohet më tej me përpjekjet që Banka e Shqipërisë i ka kushtuar përmirësimit të kuadrit rregullativ të sistemit financiar. Z. Paolucci u shpreh se Banka Botërore mbetet kurdoherë e gatshme të japë asistencën e saj.
Në mbyllje, Guvernatori shprehu edhe njëherë mirënjohje për mbështetjen shumëvjeçare të Bankës Botërore, duke kontribuuar kështu për arritjen e shumë objektivave dhe tejkalimin e po aq sfidave, si partnere e rëndësishme në hartimin dhe zbatimin e projekteve, si dhe për asistencën teknike të ofruar.
Postimi ” Sejko: Pasiguria globale e lartë, politika monetare do varet nga informacionet e reja ” eshte marre nga Revista Monitor.
