Shitjet globale të makinave tërësisht elektrike dhe hibride plug-in u rritën me 26% në shtator, krahasuar me një vit më parë, duke arritur rekordin 2.1 milionë njësi, falë kërkesës së fortë në Kinë dhe garës së lehtësive fiskale në Shtetet e Bashkuara – deklaroi të mërkurën shoqëria e kërkimit të tregut Rho Motion.
Kina përfaqëson rreth dy të tretat e shitjeve globale me rreth 1.3 milionë njësi, ndërkohë që edhe Amerika e Veriut shënoi një rekord, pasi blerësit amerikanë u përpoqën të përfitonin lehtësi fiskale para përfundimit të tyre, tha Charles Lester, përgjegjës i të dhënave në Rho Motion.
Kina është tregu më i madh në botë i makinave dhe përfaqëson më shumë se gjysmën e shitjeve të makinave elektrike në botë, që sipas të dhënave të Rho Motion përfshijnë edhe makina elektrike me bateri dhe hibride plug-in.
Shtatori, që zakonisht është muaji më i ngarkuar për blerjen e makinave në Kinë, regjistroi rritje të shitjeve, pasi blerësit u përpoqën të përfitonin në maksimum nga subvencionet për ndërrimin e makinave përpara se disa rajone të fillonin t’i hiqnin ato.
Kërkesa në Shtetet e Bashkuara u rrit, pasi blerësit nxituan të përfitonin nga rimbursimi i taksës prej 7,500 dollarësh për makinat elektrike, edhe pse pritet që kërkesa të bjerë drastikisht në tremujorin e katërt “meqenëse si konsumatorët edhe bizneset do të humbasin mundësinë ndaj stimujve federalë që kanë mbështetur blerjet e makinave elektrike”, deklaroi shoqëria e kërkimit të tregut, Rho Motion.
Edhe Europa arriti një rekord të ri, falë stimujve në Gjermani dhe kërkesës së fortë në Britaninë e Madhe, ndërkohë që prezantimi nga Tesla i Model Y me kosto të ulët në Europë pritet të rrisë më tej konkurrencën në muajt e ardhshëm.
Shifrat
Sipas të dhënave të Rho Motion, shitjet globale të makinave elektrike me bateri dhe hibride plug-in u rritën me 26% duke arritur rekordin prej 2.1 milionë njësi në shtator.
Shitjet në Kinë u rritën me rreth 1.3 milionë makina.
Shitjet në Europë u rritën me 36% në 427.541 njësi, ndërsa shitjet në Amerikën e Veriut u rritën me 66% në rreth 215.000 njësi. Shitjet në pjesën tjetër të botës u rritën me 48% në 153.594 njësi.
/ Reuters
Postimi ” Shitjet globale të makinave elektrike arrijnë rekordin 2.1 milionë njësi në shtator ” eshte marre nga Revista Monitor.
