Qytetarët shqiptarë kanë konsumuar më shumë karburant gjatë muajit Shkurt 2024 dhe duket se ky trend është favorizuar dhe nga koha e mirë çka nxit më shumë lëvizje si dhe nga turistët.
Të dhënat e Drejtorisë së Përgjithshme të Doganave, tregojnë se produktet e akcizës dhe në veçanti karburantet, në muajin Shkurt kanë dhënë një efekt pozitiv në rritjen e të ardhurave doganore.
Rritja e konsumit të karburanteve, si një nga produktet kryesore që ndikon në zinxhirin ekonomik të mallrave dhe shërbimeve, sinjalizon rritje të kërkesës së brendshme dhe rritje ekonomike.
Sipas doganave për muajin shkurt janë 46.830 ton karburant të deklaruara për konsum , apo rreth 5300 ton më shumë se në Shkurt 2023. Shifra rezulton të jetë më e larta në 5 vitet e fundit nëse do të marrim në analizë muajin shkurt.
Lidhur më të ardhurat totale, doganat kanë arkëtuar në muajin që lamë pas 17 miliardë lekë apo rreth 164 milionë euro, duke shënuar nivelin më të lartë krahasuar me Shkurtin e viteve të mëparshme.
Pavarësisht luhatjeve të kursit të këmbimit, të cilat janë në disfavor të importeve, të ardhurat krahasuar me muajin Shkurt 2023 janë tejkaluar në afro 12 milionë euro, apo 7.6 për qind.
Ndërsa krahasuar me Janarin e këtij viti u mblodhën afro 19 milionë euro më shumë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
