Rritja e çmimeve të derivateve pas shpërthimit të luftës në Lindjen e Mesme po reflektohet përherë e më shumë edhe në tregun e Kosovës. Çmimi për një litër naftë tashmë ka shkuar në 1.60 euro.
Deri në 1.60 euro për litër ka arritur çmimi i naftës në tregun me pakicë në Kosovë të hënën.
Sipas Shoqatës së Naftëtarëve, çmimet e naftës varësisht nga kompanitë sillen nga 1.53 deri 1.60 euro për litër, ndërsa i benzinës nga 1.34 deri 1.38 euro për litër.
“Çmimet po ndryshojnë në varësi të kompanive, ku nafta shitet nga 1.53 deri në 1.60 euro për litër. Ndërkohë, benzina kushton nga 1.34 deri në 1.38 euro për litër. Çmimi i naftës me shumicë aktualisht është rreth 1.54 euro për litër”.
Rritja po vazhdon si pasojë e përshkallëzimit të konfliktit në Lindjen e Mesme.
Dallimi në çmime është duke u vrenjtur me ta madhe, krahasuar deklarimeve dhe vendimeve që janë marrë ditë me parë nga institucionet e Kosovës.
Më 5 mars ka hyrë në fuqi vendimi i Ministrisë së Tregtisë, Industrisë e Ndërmarrësisë (MINT) për caktimin e marzhës tregtare.
Vendimi përcakton marzhë të fitimit prej 2 cent për shitjet me shumicë dhe 12 centë për shitjet me pakicë.
Ministrja Mimoza Kusari-Lila, ka njoftuar se nga dita e enjte do të hyjnë në fuqi çmimet e reja maksimale për derivatet e naftës në treg.
Sipas saj, bazuar në të dhënat e importit të ditës së fundit, çmimet e derivateve kanë shënuar rënie.
“Importi është realizuar me çmimin 1.40 euro për litër për naftën dhe 1.22 euro për litër për benzinën”, kishte deklaruar ajo.
Duke u bazuar në vendimin në fuqi për marzhën e fitimit, ajo bëri të ditur se çmimi maksimal i lejuar në treg nuk mund të jetë më i lartë se:
Nafta: 1.54 euro për litër
Benzina: 1.36 euro për litër
Kusari-Lila u ka bërë thirrje qytetarëve që të raportojnë çdo parregullsi në tregun e derivateve përmes numrit pa pagesë 0800 11000.
Ndërkohë, Inspektorati Qendror i Mbikëqyrjes së Tregut ka njoftuar se është duke realizuar mbikëqyrje intensive lidhur me zbatimin e vendimit për rregullimin e përkohshëm të çmimeve, me qëllim mbrojtjen e konsumatorit dhe garantimin e konkurrencës së ndershme në treg.
Sipas këtij institucioni, në bashkëpunim me Administratën Tatimore të Kosovës po analizohen të dhënat lidhur me çmimet e importit dhe ato të ekspozuara për konsumatorët në tregun vendor.
Bazuar në të dhënat zyrtare nga Dogana e Kosovës për datën 11 mars 2026, çmimi mesatar i importit për derivatet e naftës ka qenë:
Naftë (Dizel): 1.40 euro për litër
Benzinë: 1.22 euro për litër
Ndërsa sipas monitorimit që, sipas tyre, është bërë në tregun vendor, çmimet e ekspozuara për konsumatorët janë raportuar:
Naftë (Dizel): nga 1.44 deri në 1.54 euro për litër
Benzinë: nga 1.18 deri në 1.31 euro për litër
Sipas vendimit të 4 marsit 2026 për rregullimin e përkohshëm të çmimeve, është vendosur marzha tregtare maksimale prej dy eurocentë për litër për shitjet me shumicë dhe 12 eurocentë për litër për shitjet me pakicë.
Çmimi i naftës në botë është rritur në nivelin më të lartë që nga korriku i vitit 2022 të dielën në mbrëmje, pasi administrata e presidentit amerikan Donald Trump sugjeroi se lufta me Iranin mund të zgjasë edhe disa javë, ndërkaq vetë presidenti i ka bërë thirrje komunitetit ndërkombëtar për ndihmë në rihapjen e Ngushticës së Hormuzit për cisternat e naftës.
Postimi ” Shtrenjtohen sërish derivatet në Kosovë, nafta shkon në 1.60 euro për litër ” eshte marre nga Revista Monitor.
