Skema e financimit nga buxheti i shtetit për bashkitë që do të shpallen fituese pas përfundimit të aplikimeve të projekteve për strehimin social, parashikon shpërndarjen e fondeve varësi të nivelit të ardhurave për frymë të 2023-it.
Në dokumentin “Projektet e investimit që do të financohen nga buxheti i shtetit në vitet 2025-2026” përcaktohet se kufijtë e financimit nga buxheti i shtetit për programet sociale do të jenë në varësi të nivelit të ardhurave për frymë për çdo bashki, për 2023.
Skema e financimit përfshin që për të ardhurat për frymë të njësive vendore më të ulëta se 2,000 lekë financimi nga buxheti i shtetit do të jetë deri në 100%.
Për njësitë vendore ku të ardhurat për frymë janë në fashën e 2,001 deri 4,000 lekë financimi nga buxheti i shtetit për projektet e strehimit do të jetë 80%.
Për bashkitë që të ardhurat për frymë variojnë nga 4,001–6,000 lekë, financimi do të jetë në masën 70%. Për bashkitë me të ardhura nga 6,001 deri 8,000 lekë për frymë financimi do të jetë deri në 60%.
Deri në masën 50% financimi nga buxheti i shtetit do të jetë për ato bashki që rezultojnë me të ardhura për frymë në 2023 mbi 8,001 lekë.
“Projekte të cilat grumbullojnë pikët maksimale do të shpallen fituese. Nëse disa projekte shpallen fituese dhe fondet janë të pa-mjaftueshme, mënyra e shpërndarjes së fondeve do të rishikohet për të gjetur rrugën më optimale”, citohet në dokument.
Nga bashkitë dosja e aplikimit, me dokumentacionin që kërkohet sipas llojit të projektit, do të dorëzohet zyrtarisht pranë Drejtorisë së Strehimit. Afati për dorëzimin e dosjeve të aplikimit do të jetë deri më 31 janar 2025.
Në dokumentin “Projektet e investimit që do të financohen nga buxheti i shtetit në vitet 2025-2026” përcaktohet gjithashtu se dokumentacioni, pjesë e Dosjes së Aplikimit, që do të shoqërojë kërkesën për fonde, do t’i paraqitet për shqyrtim dhe vlerësim Komisionit të Vlerësimit të Projekteve pranë MEKI-t (çdo dokumentacion tjetër që nuk është pjesë e Dosjes së Aplikimit, nuk do të merret në konsideratë për pikëzim);
Dosja e Plotë e projektit, me dokumentacionin e projektit të kërkuar sipas termave të referencës, depozitohet dhe inventarizohet vetëm pranë bashkisë. Dosja e Plotë e projektit përmban dokumentacionin e Dosjes së Aplikimit dhe gjithë dokumentacionin tjetër, të kërkuar në pikën 2.3.3 për çdo kategori/ lloj programi.
Krahas tyre, bashkitë duhet të dorëzojnë edhe dokumentacionin tekniko-ekonomik dhe ligjor duhet të hartohet nga specialistë të fushës dhe të miratohet nga titullari. Preventivat hartohen në sistemin e integruar, referuar VKM Nr. 216/2023. Informacioni tabelat përmbledhës duhet të jetë i miratuar nga Titullari (në të gjitha faqet ose me vulë lidhëse). Tabela duhet të dërgohet edhe në formatin excel në adresën drejtoria.strehimit@meki.gov.al;
Bashkia është përgjegjëse për menaxhimin e gjithë ciklit të projektit, përfshirë dosjen e plotë të projektit, hartimin e projektit dhe zbatimin e tij sipas KTZ-ve në fuqi, llogaritjen e saktë të preventivit në sistemin e integruar referuar VKM Nr. 216/2023, realizimin e procedurës së prokurimit, mbikëqyrjen, kolaudimin dhe deri në marrjen në dorëzim të objektit (Certifikatë dhe Formulari vlerësimit).
Afati i grafikut të punimeve për realizimin e kontratës të parashikohet duke marrë parasysh vlerën e projektit dhe afatet e realizimit me sukses të fondeve brenda një viti buxhetor, referuar përcaktimeve në legjislacionin e ndërtimit dhe Ligjit të Buxhetit. Afati kohor i realizimit të punimeve për objekte me vlera më të vogla se 20 mln lekë të mos jetë më i madh se 4 muaj.
Projektet që mund të financohen sipas llojit të programit, zërave të preventivit të punimeve dhe kufijtë maksimalë të lejuar të financimit do të përfshijnë projekte, si: për banesa sociale me qira, blerje nga tregu; banesë sociale me qira, adaptim i objektit ekzistues; banesë sociale me qira, ndërtim i ri; përmirësim i banesave ekzistuese për komunitete të varfra dhe të pa favorizuar; përmirësim i infrastrukturës kryesisht në zona informale që janë në proces legalizimi; streha të përkohshme, blerje dhe montim (të kontejnerëve, tendave, etj.) dhe streha të përkohshme, adaptim objekti ekzistues.
Kategoritë përfituese të strehimit social në total do të jenë 16, dukë përfshirë familjet me një prind, familjet me më shumë se 4 fëmijë, emigrantët e rikthyer, familjet e mbetura të pastreha për shkak të lirimit të banesave ish-pronarëve, punëtorët emigrant dhe azilkërkuesit, familjet e policëve të rënë në detyrë etj./ D.Azo
Postimi ” Skema e financimit nga buxheti i shtetit për programet sociale, në varësi të ardhurave për frymë ” eshte marre nga Revista Monitor.
