Kaskada e lumit Devoll pritet të prodhojë më shumë energji elektrike. Kompania norvegjeze Statkraf, ka nënshkuar shtesën e katërt të kontratës koncesionare me Ministrinë e Infrastrukturës dhe Energjisë, dokument që ka mbërritur për ratifikim në Kuvend.
Kontrata parashikon ndërtimin e një rezervuari të ri në kaskadën e Devollit, i quajtur “Rezervuari i epërm i RP Moglica Shtesë”, që gjendet rreth 8 km në lindje të digës se Moglicës. Rezervuari i Epërm do të përbëhet nga 2 diga me mbushje shkëmbore, në lartësi nga 20 deri 70 m. Centrali nëntokësor gjendet në kodrën në anën e majtë të degës së lumit Devoll të rezervuarit të Moglicës dhe është i pajisur me turbina me pompë të kthyeshme. Kapaciteti i instaluar do të jetë afërsisht 800-1600 MW subjekt i projektit final. Gjithshka, sipas kontratës, pritet të përfundojë në vitin 2030, kur parashikohet të vihet në operim.
Në këtë mënyrë, Kaskada e Devollit pritet të jetë më e madhja në Shqipëri duke kaluar atë të lumit Drin, kapaciteti i instaluar i të cilit është 1400 MW.
Aktualisht, në kaskadën e lumit Devoll janë në operim dy hidrocentrale. Në vitin 2013 filloi ndërtimi i HEC Banja, që përfundoi dhe hyri në operim në vitin 2016. Ndërtimi i HEC Moglicë filloi në vitin 2015 dhe operimi i hidrocentralit filloi në vitin 2020. Të dy këto vepra kanë një kapacitet të instaluar prej rreth 269 MW dhe prodhim rreth 700 GWh/vit. Ndërkohë, këtë vit ka nisur operimin edhe impianti fotovoltaik lundrues i Banjës me kapacitet të instaluar prej 2 MW.
Kosto e investimit të Projektit Hidroenergjetik të Devollit vlerësohet në rreth 590 milionë euro. Ndërkohë, sipas të dhënave zyrtare të vetë kompanisë prodhimi total i energjisë elektrike gjatë vitit 2022 ishte 490.343 MWh, reduktim prej rreth 28% krahasuar me vitin 2021 për shkak të hidrologjisë së pafavorshme. Por, nga ana tjetër, në këtë vit të ardhurat u shtuan për shkak të rritjes së çmimit të energjisë në bursat botërore. Kështu, të ardhurat neto nga aktivitetet e shfrytëzimit u regjistruan 14,514 miliardë lekë një rritje tepër e madhe krahasuar me 278,4 milionë lekë të vitit paraardhës.
Pikërisht, zgjerimi i fitimeve për shkak të rritjes së çmimit të energjisë, detyroi qeverinë shqiptare që në fund të vitit të kaluar të vendosë një tatim të jashtëzakonshëm, i cili prek tre prodhuesit më të mëdhenj të energjisë në vend, që janë kompanitë Kurum, Statkraft-Devolli Hydropower dhe Ayen Energy.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
