Nënkomisioni për Administratën Publike në një mbledhje të mbajtur, ka zhvilluar një dëgjesë me Drejtoreshën e Përgjithshme të Departamentit të Administratës Publike, Albana Koçiu e cila ka folur në lidhje me konstatimet dhe rekomandimet e lëna në progres-raportin e Komisionit Evropian për Shqipërinë për vitin 2022 lidhur me shërbimin civil.
Koçiu bëri një prezantim të punës së bërë nga DAP për reformimin e administratës publike, si një fushë prioritare, për procesin e integrimit në BE.
“Parimet e administratës publike në të 6 fushat kryesore në të cilat mbështetet diskutimi, kanë të bëjnë thelbësisht me kornizën strategjike të reformës së administratës publike; zhvillimin dhe koordinimin e politikave; shërbimin civil dhe menaxhimin e burimeve njerëzore; llogaridhënien; ofrimin e shërbimeve publike dhe menaxhimin e financave publike. Këto janë 6 parimet kryesore mbi të cilat ne vlerësohemi nga KE për përgatitjet që administrata publike ka në kontekstin e anëtarësimit”, sqaroi Koçiu, duke shtuar se, që prej shtatorit të vitit të kaluar DAP ka zhvilluar një sërë takimesh me përfaqësuesit e BE për shpjegimin e të gjithë procesit dhe mënyrës se si vendi do të vlerësohet në këtë aspekt, arritjet, sfidat dhe objektivat.
Koçiu u shpreh se, DAP është në pritje të një raporti vlerësues të të gjithë procesit të deritanishëm, në mënyrë që më pas të draftohet një udhërrëfyes mbi punën dhe angazhimet që duhen ndërmarrë, në kuadër të reformimit të administratës publike.
Drejtuesja e DAP theksoi se po punohet edhe për strategjinë e re të administratës publike 2023-2030, për të cilin po bashkëpunohet me SIGMA-n, që është një instrument i rëndësishëm i KE.
Koçiu u ndal edhe tek rekomandimet e lëna nga KE, duke sqaruar masat e marra, të cilat janë vlerësuar edhe nga SIGMA, lidhur me procedurën e rekrutimit, dixhitalizimin dhe rritjen e transparencës së të gjithë procesit; rekrutimin e TND-ve, iniciativat për reformën e skemës së pagave, përshkrimet e vendeve të punës, vlerësimin e performancës, etj.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
