Muaji tetor i ka gjetur bizneset e konsumatorët pesimistë lidhur me pritshmëritë ekonomike. Sondazhi periodik i Bankës së Shqipërisë konkludon që treguesi i ndjesisë ekonomike regjistroi rënie të theksuar me 2.4 pikë në muajin shtator, por gjithësesi, duke mbetur përsëri mbi mesataren historike. Ndërkaq, treguesi i besimit konsumator mbeti i pandryshuar në shtator në krahasim me një muaj më parë dhe shumë pranë nivelit të mesatares së tij historike. Komponentët përbërës të besimit konsumator këtë muaj dhanë kontribute me kahe të ndryshme: pritjet për blerjet në shuma të mëdha dhe për situatën financiare në të ardhmen u rritën, ndërsa vlerësimi për blerjet aktuale në shuma të mëdha dhe pritjet për gjendjen e përgjithshme të ekonomisë në të ardhmen u ulën.
Treguesi i besimit në shërbime ka qenë ndër kontribuesit më me peshën në rënien e pritshmërive ekonomike. Ai ra me 4.6 pikë përqindje në shtator, por duke vijuar të qëndrojë mbi mesataren historike, me 19 pikë përqindje. Në rënie kontribuuan njësoj vlerësimet më pak optimiste të bizneseve si për ecurinë aktuale të aktivitetit të tyre, ashtu edhe për nivelin e kërkesës. Gjithashtu, pritjet për kërkesën dhe nivelin e punësimit në të ardhmen vlerësohen në rënie nga bizneset e shërbimeve. Pritjet e tyre për ecurinë e çmimeve në të ardhmen janë ulur.
Treguesi i besimit në tregti regjistroi rënie më të lehtë me 0.2 pikë përqindje në muajin shtator. Aktualisht, niveli qëndron 12 pikë mbi mesataren historike. Në rënien mujore ndikuan prirjet më pesimiste për punësimin në të ardhmen. Nga ana tjetër, vlerësimet për ecurinë aktuale të biznesit të tyre shënuan rritje të lehtë. Pritjet për çmimet në të ardhmen u vlerësuan me rritje.
Të dhënat me frekuencë tremujore, sipas Bankës së Shqipërisë, tregojnë për nivele të larta të gjendjes financiare të bizneseve sipas sektorëve, afër vlerave maksimale përkatëse, megjithëse me rënie në krahasim me tremujorin e dytë.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
