Elisabeta Dosku/
Rimbursimi i TVSH-së do tu marrë më pak kohë bizneseve nga sa duhet të presin aktualisht. Administrata Tatimore parashikon që të finalizojë modulin e automatizimit të pagesës së shumës së miratuar për rimbursim nëpërmjet realizimit të lidhjes automatike ndërmjet sistemit të Tatimeve dhe sistemit AFMIS të Thesarit.
Kjo masë, do ti reduktojë bizneseve të paktën 10 ditë pritje, pasi deri në 2027 planifikohet që afati mesatar i rimbursimit të arrijë në 25 ditë nga 35 ditë që është aktualisht.
Të dhënat zyrtare nga Ministria e Financave, tregojnë se vetëm për periudhën janar- gusht 2024, bizneseve u janë kthyer 16.4 miliardë lekë TVSH apo rreth 164 milionë euro, duke shënuar një rritje me 33.9% në raport me të njëjtën periudhë të një viti më parë dhe duke tejkaluar planin e rimbursimit të TVSH-së për 8-mujorin 2024 me 40.3%
Muaji me vlerën më të lartë të rimbursimeve është Prilli me rreth 4 miliardë lekë, ndërsa në Gusht u rimbursuan afro 1,7 miliardë lekë.
Personat e tatueshëm, të regjistruar për TVSH-në, që rezultojnë me tepricë kreditore mbi 400.000 mijë lekë, kanë të drejtë të paraqesin kërkesën për rimbursimin e TVSH-së pranë Drejtorisë së Rimbursimit të TVSH-së në Drejtorinë e Përgjithshme të Tatimeve. Kjo kërkesë paraqitet sipas formularit të miratuar “Kërkesë për rimbursimin e TVSH-së” (online si dhe zyrtarisht pranë Drejtorisë së Rimbursimit të TVSH-së në Drejtorinë e Përgjithshme të Tatimeve).
Rimbursimi i TVSH-së kryhet brenda 60 ditëve nga data e paraqitjes së kërkesës nëpërmjet sistemit të Thesarit. Kërkesa për rimbursim i nënshtrohet procedurës normale të rimbursimit duke iu nënshtruar analizës se riskut për rimbursim. Rimbursohen automatikisht brenda 30 ditëve nga data e paraqitjes së kërkesës për rimbursim të TVSH-së, si persona me risk zero. Në rast të mosrimbursimit të shumës së miratuar për rimbursim, personit të tatueshëm i lind e drejta e mospagesës së detyrimeve të tjera tatimore në masën e TVSH-së së pretenduar për rimbursim.
Nëse një rimbursim, i cili duhej kryer nga administrata tatimore, nuk kryhet brenda afateve ligjore, administrata tatimore paguan kamatëvonesë për shumën e paguar më tepër.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
