Teksa aktualisht vendi ynë prodhon thuajse 100% të energjisë nga burime të rinovueshme, energjia fosile do të jetë në fokus të investimeve në burime të reja energjetike. Sipas Dokumentit të Politikave Prioritare 2024 -2026, do të kryhen disa investime që rrisin kapacitet gjeneruese të bazuara në lëndë djegëse fosile, me qëllim uljen e varësisë nga ndryshimet klimatike dhe diversifikimin e gjeografisë së gjenerimit të energjisë. Dokumenti nuk jep detaje mbi projektet që pritet të zbatohen në këtë drejtim dhe sesa do të jetë kapaciteti i instaluar.
Ndërkohë që, aktualisht janë bërë publike planet për ndërtimin e gazsjellësit Fier – Vlorë, me qëllim funksionimin e TEC-it të Vlorës, duke përdorur gazin si burim të prodhimit të energjisë. Paralelisht, një aplikim për TEC privat ka avancuar me procedurat për pajisjen me dokumentet e nevojshme për zbatimin e projektit. Projekti i Termocentralit me Cikël të Kombinuar me gaz natyror do të zhvillohet, ngrihet dhe operohet nga investitori në zonën e Roskovec-it.
Ndërkohë që, furnizimi dhe burimi i gazit natyror është tashmë plotësisht i mbrojtur për shkak të marrëveshjes së nënshkruar, në shkurt 2022, midis GEK TERNA dhe Korporatës Publike të Gazit të Greqisë.
Sipas marrëveshjes, kjo e fundit do të furnizojë rreth 2 TW/vit gaz për një periudhë prej të paktën 7 vjetësh, e dorëzuar në Pikën e Ndërlidhjes ABV31 të Gazsjellësit Trans Adriatik (TAP) në Roskovec, sipas kushteve te tregut dhe kontratës. Ndërkaq, edhe 2 TEC-et lundures, që u morën me qira vitin që shkoi janë në pritje të nisjes së funksionimit për gjenerimin e energjisë nga mazuti.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
