Enti Rregullator i Energjisë kërkon ndërmarrjen e politikave për adresimin e varfërisë energjetike, që prek shumë familje shqiptare. Ky dikaster ka publikuar një dokument vlerësues mbi politikat rregullatore për mbrojtjen e klientëve në nevojë në sektorin e energjisë elektrike, ku thekson se adresimi i plotë i problemit kërkon jo vetëm ndërhyrje afatshkurtër, përmes mbështetjes në faturë, por edhe duke siguruar infrastrukturë dhe zgjidhje të qëndrueshme.
Sipas ERE-s, këtu përfshihen politkat e eficiencës së energjisë që zvogëlojë konsumin dhe, rrjedhimisht edhe kostot e energjisë, që ndikojnë në shpenzimet totale të familjeve. “Duke e shqyrtuar problemin ne tërësi është nevojshme të përgatiten mekanizmat, me fonde publike dhe private, të afta për të siguruar burime të mjaftueshme”, – thuhet ndër të tjera në dokument.
Varfëria energjitike kuptohet gjerësisht si paaftësia e familjeve për të mbajtur nivele të përshtatshme të shërbimeve të energjisë me një kosto të përballueshme. Ndërkohë që, sipas ERE-s ky koncept në Shqipëri lidhet me termin klient në nevojë, teksa ndihma sociale është i vetmi mjet i ndërhyrjes së vazhdueshme përmes buxhetit të shtetit. Sipas të dhënave zyrtare janë rreth 68 mijë familje, që jetojnë me ndihmë ekonomike e që janë më rrezikuarat të bien në varfëri energjetike.
Ndërkaq, sipas Entit Rregullator të Energjisë adresimi i këtij problemi kërkon bashkëpunim në të gjitha nivelet si të pushtetit qëndror, atij vendor dhe instucioneve specifike me ekspertizë në sektorin e energjisë elektrike, çka do të mundësonte jo vetem mbështetje financiare por dhe mbeshtetje profesionale në vlerësimin e zgjedhjeve të duhura që ndikojnë në eficiencën e energjisë dhe ulin kostot e sigurimit të energjisë elektrike.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
