Ka dy emra rezultati i zgjedhjeve të mesmandatit në Shtetet e Bashkuara të Amerikës 2022: ai i Ron DeSantis, republikan dhe një rival i madh i Trump, i cili u konfirmua si guvernator i Floridas dhe John Fetterman, demokrati, i cili po merr veten nga një iktus, i cili fitoi në Pensilvani. Dy histori amerikane që japin një panoramë të rëndësishme për të kuptuar se ku po shkojnë Shtetet e Bashkuara të Amerikës në gjysmën e mandatit të Joe Biden, me Trump që me shumë mundësi do të rikandidojë për në Shtëpinë e Bardhë. Por, para se të bëjë një gjë të tillë duhet të ruhet mirë nga rivalët brenda partisë së tij.
CV e Ron DeSantis është pothuajse e përsosur: 44 vjeç, italoamerikan, i diplomuar në Harvard dhe Yale, ish-atlet dhe ish-ushtarak; ra në sy në nivel kombëtar në vitin 2019. Një ditë pas fitores së tij si guvernator i Floridas, kur duhej të përballej me dëmet e shkaktuara nga uragani Michael, ai hoqi xhaketën dhe kollaren, duke veshur një xhaketë të lehtë kundra erës me simbolin e shtetit. Një sjellje që i pëlqeu shumë opinionit publik.
Më pas shpërtheu pandemia e Covid dhe DeSantis ra sërish në sy me një përgjigje jo të zakontë ndaj situatës duke u ktheyer në një hero për konservatorët. Që atëherë ai ka shfrytëzuar një kombinim mes dinakërisë dhe kërkimeve të llogaritura për armikun, një herë të huajt, një herë tjetër elita e më pas liberalët. Kjo e bëri atë njeriun e momentit për populistët dhe sovranistët. Tashmë të gjithë e dinë që DeSantis do të kërkojë kandidaturën republikane për zgjedhjet presidenciale të 2024-ës. Për këtë arsye Trump i frikësohet dhe e sulmon si të ishte një rival.
Një personazh krejt i kundërt John Fetterman, i cili fitoi në Pensilvani. 53 vjeç, i diplomuar për financë, u bë i njohur që në vitin 2020, për qasjen e tij pak konvencionale: ai vishet zakonisht me një bluzë dhe pantallona të shkurtra, është pa flokë, ka mjekër dhe shumë tatuazhe që mbulojnë trupin e tij rreth 2 metra të gjatë. Në vendin e zëvendësguvernatorit të Pensilvanisë, menjëherë pas zgjedhjeve të fundit presidenciale ai iu përgjigj akuzave të Trump duke thënë se të vetmet raste manipulimesh në procesin zgjedhor në Pensilvani, ishin votuesit republikanë që hidhnin votën për të afërmit e tyre, të vdekur apo të gjallë. Disa ditë para se të merrte kanidaturën zyrtare për demokratët u godit nga një iktus i rëndë.
Pasojat e sëmundjes kushtëzuan fushatën e tij elektorale, pasi aktualisht e ka pak të vështirë të përpunojë informacionet që i vijnë. Dhe për t’u përgjigjur në kohë reale në intervista duhet të mbështetet tek teknologjitë që titrojnë pyetjet e gazetarëve. Ndonjëherë tregon vështirësi në të folur, ose bën shumë pushime gjatë fjalimeve të tij. Rivali i tij republikan Mehmet Oz e sulmoi për paaftësi, duke i thënë se gjendja e tij i jepte një avantazh tek votuesit pasi atyre iu dhimbsej. Por këto sulme nuk ndikuan në rezultatin e votimit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
