Ola Mitre/
Ministria e Turizmit dhe Mjedisit ka nxjerrë për konsultim publik draft Strategjinë Kombëtare të Turizmit 2024 – 2030, që është dokumenti bazë për orientimin e zhvillimit të sektorit në 6 vitet e ardhshme.
Në draft thuhet se modeli i përzgjedhur është ai i zhvillimit të qëndrueshëm bazuar në tre aspekte themelore siç janë ato mjedisore, sociale dhe ekonomike, ndërsa qëllimi është shtrirja e sezonit përgjatë gjithë vitit, duke diversifikuar ofertën turstike.
Strategjia bazohet në gjashtë prioritete kyçe të zhvillimit që janë: investimet, politika rregullatore dhe fiskale e turizmit, menaxhimi i destinacioneve, zhvillimi i produkteve turistike, marketingu i destinacioneve dhe ngritja e kapaciteteve.
Për secilën prej prioriteteve përcaktohen politikat përkatëse që do të ndiqen, duke specifikuar se në drejtim të investimeve do të zbatohen një gamë stimujsh fiskalë, mekanizma mbështetës dhe skema të përshtatura të investimeve për të tërhequr investitorët vendas dhe ndërkombëtarë në projektet strategjike të turizmit.
Përmes aplikimit të masave të parashikuar, sipas draftit do të ketë një rritje të numrit të shtretërve dhe diversifikim i motiveve të ardhjes në Shqipëri, duke zvogëluar me 35% numrin e netqëndrimeve gjatë pikut të sezonit veror dhe rritjen e tyre jashtë tij.
Po ashtu parashikohet një rritje e numrit të të punësuarve, nga 42 698 individë që u raportuan nga INSTAT në vitin 2023, në 73 778 persona, në vitin 2030. Sipas draftit të ardhurat nga turizmi pas masave që do ndërmerren do të rriten nga 4.16 mld euro, në 6.7 mld euro deri në vitin 2030.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
