Siç e kishte paralajmëruar pak ditë më parë, Banka e Shqipërisë nisi menjëherë shtimin e kuotave të blerjes së euros në tregun e brendshëm për të frenuar tendencën e saj nënçmuese në raportin e saj me lekun. Ajo dyfishoi kuotën e caktuar të blerjes për javën që sapo lamë pas. Në kalendarin vjetor të ndërhyrjeve në treg, Banka e Shqipërisë kishte caktuar kuotën maksimale prej 9 milionë eurosh blerje në tregun e brendshëm në këtë ankand. Ndërkohë që u blenë në ankandin e fundjavës së shkuar 18 milionë euro. Duhet pritur gjatë javës për të kuptuar nëse tërheqja e kësaj shume do të japë efektin e dëshiruar, por duke ju referuar rezultateve të ndërhyrjeve të mëparëshme, vështirë se kjo blerje do ketë ndikim domethënës në kursin euro lek.
Ky është ankandi i 11-të për këtë vit i Bankës së Shqipërisë përmes të cilëve janë tërhequr nga tregu në total 188 milionë euro, por pa efekte të dukshme.
Eskpertët e pyetur nga Televizioni Scan thonë se zor që tërheqja nga tregu e shumave të ngjashme të kenë ndikim të ndjeshëm duke parë sasinë shumë të lartë të valutës që qarkullon në tregun e brendshëm. Ata thonë se edhe rritja e paralajmëruar e blerjeve me 80 milionë euro deri në fund të vitit, vështirë që të sjellë efekte të ndjeshme në kursin e këbimit euro-lek.
Këtë muaj Banka e Shqipërisë bëri me dije zyrtarisht se do të rriste blerjet e euros në tregun e brendshëm.
Nga kufiri prej 220 milionë eurosh i përcaktuar në fillim të këtij viti, Banka e Shqipërisë ka çuar në 300 milionë, për të ulur kështu disi volumin shumë të lartë të monedhës së përbashkët europiane që qarkullon në tregun shqiptar. Vendimi vjen edhe pasi Banka e Shqipërisë ka blerë deri në këtë fazë të vitit rreth 188 milionë euro në tregun e brendshëm, duke ju afruar ndjeshëm kufirit maksimal prej 220 milionë euro të përcaktuar në fillim të vitit.
Banka e Shqipërisë është gjendur së fundmi nën presion nga eksportuesit, si dhe aktorë të tjerë të varur nga monedha e përbashkët europiane, të cilët po vihen në vështirësi nga një nënçmim kaq i fortë i saj.
Ndërkohë që vetë Banka e Shqipërisë sheh më shumë efekte pozitive se negative nga forcimi i vazhdueshëm i lekut në raport me euron. Sipas saj, forcimi i lekut në raport me valutat ka ardhur nga përmirësimet strukturore të ekonomisë shqiptare, proces i nisur vite më parë. Në thelb të këtyre përmirësimeve qëndrojnë sipas Bankës së Shqipërisë remintancat, turizmi, investimet e huaja, sidomos blerjet e pasurive të patundshme nga jorezidentët.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
