Një analizë e Bankës së Shqipërisë për ecurinë e kreditimit konkludon se bankat kanë shtrënguar kushtet e kreditimit, veccanërisht për bizneset, në një kohë që vijojnë të aplikojnë kushte të lehtësuara për kredinë hipotekore në drejtim të individëve, madje ka një konkurrencë të fortë mes bankave të nivelit të dytë për këtë segment. “Nën trysninë e konkurrencës së lartë në sistem, banka individuale aplikuan kushte e terma më të lehtësuar vetëm në segmentin e individëve. Për bizneset, kushtet e termat e kreditimit mbetën të shtrënguar”, konkludon analiza e Bankës së Shqipërisë në analizë.
Kredia për sektorin privat shfaqi ngadalësim të ritmeve të rritjes në tremujorin e fundit. Kështu, pasi kulmoi në 14% në tremujorin e tretë, norma vjetore e rritjes së portofolit të kredisë u ngadalësua në 10.6% në muajin dhjetor. Ky ngadalësim pasqyroi veccanërisht ngadalësimin e kredisë në segmentin e bizneseve. Sipas monedhave, vihet re se ngadalësimi i kredisë ka reflektuar rënien më të shpejtë të ritmeve të rritjes së kredisë në valutë krahasuar me atë në lekë. Megjithatë, kreditimi në valutë ka pasur një ecuri më të mirë gjatë vitit 2022, ku norma vjetore e rritjes së tij shënoi vlerën 15.3%, ndërsa ajo e kredisë në lekë ishte 6.3%.
Nga të dhënat zyrtare të Bankës së Shqipërisë, Normat mesatare të ponderuara të interesit të huave të reja mujore të individëve në lekë për qëllime banimi në dhjetor të vitit 2022 rezultojnë në vlerën 4.53%. Nga vera e vitit të shkuar, norma e intresit të huave për blerje banesash nisi rritjen e vazhdueshme për të shkuar nga 3.8% në qershor, në mbi 4% në vjeshtë. Ato arritën vlerën më të lartë prej 4.87% në tetor të vitit të shkuar, por dy muajt e fundit tendenca rritëse u ndërpre, madje ra dukshëm në dhjetor.
I njëjti fenomen ka ndodhur edhe për huanë për blerje banesash për segmentin e individëve në euro. Edhe këtu pritej rritje normash të interesave për shkak të rritjes së normës bazë nga ana e Bankës Qendrore Evropiane. Në muajin dhjetor, Normat mesatare të ponderuara të interesit të huave të reja mujore të individëve në euro rezultuan në kuotën 2.75% në dhjetor 2022, në rënie të dukshme krahasuar me muajt shtator e tetor, kur ato u rritën mbi 3%.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
