Ola Mitre /
Biokarburantet që do tregtohen në vendin tonë do kushtojnë rreth 82.68 lekë/litër më lirë se karburantet e tjerë në treg. Sipas projektligjit të nxjerrë për konsultim publik, këto produkte do të përjashtohet nga taksat dhe tarifat, me qëllim konkurrimin me çmimin dhe rritjen e konsumit. Ndërkohë që, në relacionin shoqërues janë përllogaritur edhe kostot që do zerohen, duke nxjerrë në pah edhe efektin fnanciar që do të ketë në të ardhurat buxhetore kjo politikë fiskale.
Sipas dokumentit biokarburantet dhe lëndët e tjera djegëse të rinovueshme për transport, do të përjashtohen nga akciza prej 38.9 lekë/litër, nga taksa e qarkullimit prej 27 lekë/litër, si dhe nga taksa e karbonit prej 3 lekë/litër. Ndërkohë që, për totalin e tyre përfitohet edhe nga mosaplikimi i Tatimit mbi Vlerën e Shtuar prej 20% apo 13.78 lekë/litër.
Aplikimi parashikohet të nisë në vitin 2025 dhe sipas relacionit shoqërues të projektligjit përqindja e biokarburanteve në mishelën e karburanteve propozohet te rritet gradualisht me nga 1% për çdo vit duke filluar nga viti i ardhshëm, për të arritur në 2030 në 7%.
Për vitin 2025, detyrimi për 1% biokarburant i korrespondon një sasi prej 6,400 ton, sipas Bilancit Energjetik të vitit 2021 mbi konsumin e lëndëve djegëse nga sektori i trasportit, ku janë bazuar përllogaritjet e qeverisë. Kjo do të thotë se për vitin 2025 të ardhurat buxhetore do të ulen me 661 mln lekë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
