Kreu ekzekutiv i Meta, Mark Zuckerberg, i komunikoi punonjësve të tij se WhatsApp dhe Messenger do të nxisnin më shumë shitjet e kompanisë, në një përpjekje për të qetësuar shqetësimet rreth financave të platformës pas pushimeve të para masive nga puna.
Zuckerberg, duke iu përgjigjur pyetjeve të drejtpërdrejta të nënpunësve të kompanisë, një javë pas pushimit nga puna të 11 mijë personave, i përshkroi dy aplikacionet e mesazheve si shumë të shpejta në fitimin e të ardhurave në krahasim me reklamat në Facebook dhe Instagram. Lajmi u raportua nga agjencia Reuters. Zuckerberg shtoi se flitet shumë për mundësitë afatgjata si metaverse, por realiteti është se mesazhet për biznesin ndoshta do të jenë burimi kryesor i të ardhurave. Por paralelisht me këtë ai bëri apel se duhet punuar për të fituar më shumë para nga WhatsApp dhe Messenger.
Meta u mundëson disa konsumatorëve të flasin dhe të bëjnë transaksione me tregtarët përmes aplikacioneve të bisedës, duke përfshirë një veçori të re, për të cilën deri tani nuk janë dhënë shumë detaje.
Komentet e fundit të Zuckerberg konfirmuan një ndryshim domethënës në tonin dhe theksin e mëparshëm kur ai përqendrohej në investimet më të mëdha për metaverse, vetëm një vit më parë. Investitorët kanë vënë në pikëpyetje mençurinë e këtij vendimi pasi biznesi kryesor i reklamave të Metës ka pasur vështirësi këtë vit, duke përgjysmuar çmimin e aksioneve.
Zuckerberg theksoi se njerëzit ishin shpenzimi më i madh i Metës, pasuar nga shpenzimet kapitale, pjesa dërrmuese e të cilave shkoi në infrastrukturë për të mbështetur paketën e aplikacioneve të mediave sociale. Rreth 20% e buxhetit të Metës shkonte për Reality Labs.
Brenda Reality Labs, njësia po shpenzonte mbi gjysmën e buxhetit të saj në realitetin e shtuar (AR), me produkte si syze inteligjente që do të vazhdojnë të shfaqen “gjatë disa viteve të ardhshme” dhe disa syze “vërtet të shkëlqyera” AR më vonë gjatë dekadës. “Kjo është në një farë mënyre puna më sfiduese … por unë gjithashtu mendoj se është pjesa më e vlefshme e punës me kalimin e kohës,” tha ai.
Rreth 40% e buxhetit të Reality Labs shkoi drejt realitetit virtual, ndërsa rreth 10% u shpenzua në platforma sociale futuriste siç është bota virtuale Horizon. Shefi i Teknologjisë Andrew Bosworth, i cili drejton Reality Labs, tha se syzet AR duhet të jenë më të dobishme se telefonat celularë për të tërhequr klientët potencialë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
