Viti 2023 e ka gjetur shtetin shqiptar me një nivel rekord borxhi publik, i cili për herë të parë ka kalur pragun prej 12 miliardë eurosh. Në dy vitet e fundit, Qeveria shqiptare ka shtuar borxhin publik me 2 miliardë euro, një tjetër vlerë rekord për sa i përket ritmeve të shtimit të tij. Nga rreth 9.8 miliardë euro në vitin 2020, borxhi publik ka kërcyer në mbi 12 miliardë euro në fund të vitit 2022.
Megjithatë, me shumë gjasa nga institucionet shqiptare do të dëgjojmë në vijim vlerat e borxhit publik në raport me produktin e brendshëm bruto. Kjo pasi rritja e të ardhurave buxhetore për shkak të inflacionit gjatë vitit të shkuar, ka bërë që borxhi public të bjerë ndjeshëm në raport me Produktin e Brendshëm Bruto. I matur në këtë mënyrë, për herë të parë që prej vitit 2014 borxhi publik rezulton nën kuotën prej 70% në raport me Produktin e Brendshëm Bruto.
Sipas të dhënave zyrtare të sapopublikuara të Ministrisë së Financave, viti 2023 e ka gjetur shtetin shqiptar me një borxh public në nivelin e 1.37 milonë lekëve, sa 66.9% e Produktit të brendshëm bruto. Rënia në 2022 është drastike në raport me një vit më parë, i cili u mbyll me një total borxhi publik sa 73,1% e produktit të Brendshëm Bruto. E thënë ndryshe, në raport me PBB, borxhi publik ka rënë me thuajse 6 pikë përqindje në një vit.
Raporti kaq i mirë i borxhit në raport me produktin e Brendshëm Bruto nuk i detyrohet vetëm shtimit të të ardhurave buxhetore të Qeverisë për shkak të rritjes së çmimeve, por dhe nëncmimit të fortë të euro në raport me lekun, i cili solli lehtësim të kostove të shërbimit të borxhit të jashtëm.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
