Banka Qendrore Europiane është gati të ulë normat e interesit për herë të fundit për këtë vit, përpara se perspektiva gjithnjë e më e ndërlikuar e inflacionit të rrezikojë të nxjerrë në pah përçarjet e brendshme.
Ndërsa rreziqet e çmimeve zvogëlohen, zyrtarët kanë ulur normat e interesit shtatë herë gjatë vitit të kaluar, me pak fërkime në Këshillin Qeverisës prej 26 anëtarësh. Një lëvizje e tetë pritet të enjten, duke e çuar normën e depozitave në 2%.
Por, ndërsa disa do të donin që ky të ishte fundi – të kujdesshëm ndaj shtimit të shpenzimeve që do të vijnë nga qeveritë europiane – të tjerë duan më shumë për të mbështetur rritjen e dobët ekonomike.
Pika kryesore e ngërçit janë tarifat e Donald Trump – konkretisht, efektet e tyre të padëshiruara për çmimet e Eurozonës. BQE po harton skenarë të ndryshëm për të provuar të kuptojë më mirë se çfarë po vjen, por besimi në çdo rezultat të caktuar është i pakët.
Rezultati është se BQE po zhvendoset nga trajtimi i inflacionit të lartë në një fazë të karakterizuar nga paparashikueshmëria, të parë gjatë Covid dhe luftës së Rusisë në Ukrainë.
Do të jetë e rëndësishme që BQE-ja të jetë e vetëdujshne për rrezikun e kthimit në inflacion shumë të ulët, siç ishte rasti në dekadën para vitit 2020.”
Me rritjen e çmimeve që i afrohet objektivit 2%, investitorët ende mendojnë se do të ketë një ulje tjetër të normave pas kësaj jave, por nuk janë të sigurt se kur. Analistët janë më të sigurt për këtë, duke parashikuar lëvizje në qershor dhe shtator për një normë terminale 1.75%.
Veprimet e Trump mbi tregtinë mund t’i përmbysin këto pikëpamje. Ndërsa shumica e mallrave të Bashkimit Europian aktualisht i nënshtrohen një takse amerikane 10%, kjo mund të rritet në 50% në korrik. Analiza e skenarëve të BQE-së, që pritet të publikohet si pjesë e perspektivës së saj tremujore, nënvizon pasigurinë.
Në këto kushte, pamja e inflacionit në afat të shkurtër duket e mirë: Kostot e energjisë janë ulur ndjeshëm dhe euro është forcuar, që kur SHBA shpalli për herë të parë “tarifat reciproke” në prill. Shifrat e Eurostat për majin do të dalin të martën, me shumë mundësi për një lexim 2%, brenda objektivit.
Por mënyra se si evoluojnë çmimet do të varet nga hakmarrja e mundshme nga Brukseli dhe se si do të zhvillohet marrëdhënia SHBA-Kinë. Në planin afatgjatë, shpenzimet europiane për mbrojtjen dhe infrastrukturën, zinxhirët e furnizimit të thyer dhe një fuqi punëtore në plakje mund të ushqejnë presionin e inflacionit.
Në këtë sfond, anëtarja e ashpër e Bordit Ekzekutiv, Isabel Schnabel, ka paralajmëruar kundër më shumë lehtësimeve, duke argumentuar se BQE-ja është “në një pozicion të mirë për të vlerësuar evolucionin e mundshëm të ardhshëm të ekonomisë” dhe për të vepruar sipas nevojës.
Disa anëtarë të Këshillit Drejtues janë të hapur për veprime më të fuqishme. Pierre Wunsch i Belgjikës ka thënë se BQE-ja mund të ketë nevojë të mbështesë ekonominë “pak” për të siguruar, që inflacioni të mos bjerë nën objektiv. Gediminas Simkus i Lituanisë tha se ka rreziqe në rritje për një ulje të çmimeve. / Bloomberg
Postimi ” BQE gati për uljen e fundit të normës së interesit, tregtia nxit mosmarrëveshje rreth inflacionit ” eshte marre nga Revista Monitor.
