Volumet e tregtuara të energjisë në Bursën Shqiptare e Energjisë (ALPEX) arritën vlerën 1,670,734.1 MWh, duke shënuar një rritje prej 42.46% krahasuar me vitin 2024.
Të dhënat e raportuara nga ALPEX në raportin vjetor tregojnë se faturimi total i transaksioneve në blerje–shitje arriti në 369.46 milionë Euro, ndërsa çmimi mesatar klerues ishte 118.38 €/MWh.
Çmimi mestar klerues ka shënuar rritje në raport me një vit më parë me 5.7%. Ndërkohë çmimi maksimal gjatë 2025-ës arriti në vlerën 262.10 €/MWh dhe çmimi minimal 44.78 €/MWh.
Viti 2025 është përkufizuar nga një prodhim modest i hidroenergjisë si efekt i një viti të thatë ndërkohë që një ecuri më të mirë ka pasur energjia diellore që shënoi nivelin 13.2 për qind të prodhimit total neto në vend.
Sipas ALPEX situata e përgjithshme e transaksioneve dhe çmimeve ka reflektuar rritjen e likuiditetit, pjesëmarrjen më të gjerë të aktorëve të tregut dhe një funksionim të mirë të procesit të çmim-formimit brenda kornizës së Tregjeve të Ditës në Avancë dhe atij të Ankandeve Brenda së Njëjtës Ditë.
“Bashkimi i Tregjeve të Ditës në Avancë ndërmjet Shqipërisë dhe Kosovës ka funksionuar në mënyrë të sigurtë, me asnjë rast të Ndarjes së Plotë të Tregjeve (decouple).
Rrjedhja totale e energjisë ndërkufitare arriti në vlerën 351,152.95 MWh, duke konfirmuar përdorimin efecientë të kapaciteteve ndërkufitare dhe prodhuar çmime të njëjta midis dy zonave të ofertimit në 99.04% të MTU-ve. ALPEX konsolidoi gjithashtu funksionimin e Tregut të Ankandeve Brenda të Njëjtës Ditë (CRIDAve)” shpjegohet në raportin vjetor.
ALPEX nënvizon se gjatë vitit 2025, u tregtua një volum total prej 29,442.24 MWh, me një çmim mesatar klerues prej 139.17 €/MWh. Gjatë vitit 2025 ALPEX mirëpriti 11 Anëtarë të rinj Burse dhe 1 Anëtar të ri të Përgjithshëm Klerimi, duke arritur numrin total prej 45 Anëtarë Burse dhe 5 Anëtarë të Përgjithshëm Klerimi në fund të vitit./ N.Maho
Postimi ” Bursa e energjisë faturoi 370 milionë euro transaksione shitblerjeje në vitin 2025 ” eshte marre nga Revista Monitor.
