Ola Mitre/
Këshilli i Ministrave ka miratuar metodologjinë dhe procedurat që do të ndiqen për stokun e ndërtesave publike që do të rinovohen çdo vit, me qëllim kursimin dhe garantimin e performancës së energjisë në këto institucione. Vendimi i hap rrugë zbatimit të ligjit “Për eficiencën e energjisë” që kërkon zbatimin e objektivit që 3% e sipërfaqes totale të stokut të ndërtesave publike me ngrohje apo ftohje, në pronësi dhe të zëna nga organet e qeverisjes qendrore, dhe 2% e sipërfaqes totale të stokut të ndërtesave të tjera publike të rinovohet çdo vit për të përmbushur kërkesat minimale për performancën e energjisë.
Vendimi i miratuar në qeveri përcakton si objektiv ndërtesat e organeve të qeverisjes qendrore me performancën më të ulët të energjisë, të cilat kanë përparësi lidhur me masat për eficiencën e energjisë, kur kjo është e mundur si nga pikëpamja e kostos efektive, ashtu edhe teknikisht e realizueshme. Më konkretisht vendimi specifikon përmes një sistemi pikëzimi se prioritet do të kenë ndërtesat pa termoizolim, me dritare me një xham dhe pa sistem qendror ngrohje/ftohje, ato që kanë një numër më të lartë punonjësish për meter katror, si dhe ato që kanë konsum energjie më të madh se 300 kWh/meter katror/vit.
Po ashtu, vendimi autorizon agjencinë përgjegjëse për eficiencën e energjisë të përgatisë inventarin e të gjitha ndërtesave publike dhe të përcaktojë sipërfaqjen (në meter katror) që do të rinovohet çdo vit për ndërtesat publike. Të gjitha ndërtesat publike të rinovuara ose të ndërtuara pas vitit 2023 do të përjashtohen nga lista për t’iu nënshtruar rinovimit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
