Ledina Elezi/
Me qëllim plotësimin e kuadrit rregullativ dhe kushteve për anëtarësimin e Shqipërisë në Zonën Unike të Pagesave në Euro (SEPA), Banka e Shqipërisë ka miratuar së fundmi rregulloren “Për informacionin që shoqëron transfertat e fondeve”. Kjo rregullore përafron kërkesat e Rregullores së Bashkimit Evropian të vitit 2023, mbi informacionin që shoqëron transferimet e fondeve dhe kripto-aseteve të caktuara, për sa i përket transfertave të fondeve në vendin tonë.
Në kuadër të pjesëmarrjes në Zonën Unike të Pagesave në Euro (SEPA), për arsye të parandalimit, zbulimit dhe hetimit të pastrimit të parave dhe financimit të terrorizmit, rregullorja përcakton informacionin mbi paguesin dhe përfituesin që do të shoqërojë transfertat e fondeve në euro, ku të paktën një nga ofruesit e shërbimeve të pagesave të përfshirë në transfertën e fondeve ndodhet në Shqipëri.
Gjithashtu, përcaktohen rregulla për politikat, procedurat dhe kontrollet e brendshme për ofruesit e shërbimeve të pagesave, me qëllim zbatimin e masave shtrënguese, pavarësisht transaksionit të përfshirë ose monedhës së përdorur, si dhe kërkesa në lidhje me detyrimin për ruajtjen dhe mbrojtjen e të dhënave.
Në 12 qershor të këtij viti, Banka e Shqipërisë dërgoi pranë Këshillit Evropian të Pagesave (EPC), aplikimin zyrtar të Shqipërisë për përfshirjen në zonën gjeografike të skemave SEPA. Anëtarësimi i Shqipërisë në Zonën Unike të Pagesave në Euro është një mundësi për të integruar platformat e kryerjes së pagesave në Euro dhe të tregtisë elektronike me tregun evropian, përpara anëtarësimit të vendit tonë në BE.
Nga ky anëtarësim pritet të krijohen lehtësira për bizneset dhe konsumatorët shqiptarë, duke i bërë transaksionet financiare ndërkufitare me vendet e tregut evropian më të thjeshta, më të shpejta dhe me kosto më të ulëta.
Përfitimet ekonomike nga kryerja e pagesave me efikasitet më të lartë sa i përket kostove, kohës dhe sigurisë janë të mëdha, dhe, sipas vlerësimeve të Bankës Qendrore, mund të arrijnë deri në 20 milionë euro në vitin e parë, për t’u rritur në vijim.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
