Rritja e pagave dhe e punësimit në vend ka një efekt anësor të padëshirueshëm: ato po kontribuojnë fort në rritjen e çmimeve. Sipas një analize të Bankës së Shqipërisë, presionet inflacioniste nga jashtë kënë rënë ndjeshëm gjatë dy muajve të fundit të vitit 2022, por jo ato të brendëshmet, të cilat duken se janë shkaktari kryesor i çmimeve të larta me të cilat po vijojnë të përballen familjet shqiptare.
Paga mesatare në sektorin privat ka vazhduar të rritet me ritme dyshifrore gjatë tremujorit të tretë të vitit 2022. Rritja vjetore arriti nivelin 12.3%, nga 11.9% një tremujor më parë. Ndër kontributet sektoriale, spikatën në mënyrë të veçantë degët e “Tregtisë, transportit, akomodimit dhe shërbimit ushqimor”, “Industrisë”, “Administratës publike” dhe “Informacionit dhe komunikacionit”.
Po ashtu, kostot e punës për njësi gjatë tremujorit të tretë janë rritur me ritme të ngjashme me tremujorin e mëparshëm (3.6%, krahasuar me 3.4%). Efekti nga paga është më i fortë se ndikimi nga rritja e produktivitetit, ashtu sikurse në tremujorin e mëparshëm.
“Rritja e punësimit u përshpejtua, papunësia qëndroi në nivelin më të ulët të regjistruar dhe pagat në sektorin privat vijuan rritjen dyshifrore. Kjo është pasqyruar në norma të larta të inflacionit bazë gjatë gjithë gjysmës së dytë të vitit 2022”, thekson Banka e Shqipërisë në analizë, duke parashikuar të njëjtën gjë edhe për vitin 2023.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
