Në një sipërfaqe prej 6 hektarësh, në ish-zonën ushtarake të Farkës në kryeqytet, Qeveria do të financojë ndërtimin e një qendre multifunksionale. “Expo Albania” do të jetë një hapësirë e dedikuar për evenimente, panaire, koncerte dhe takime, njeherazi edhe si strukture akomoduese pasi parashikohet të ndërtohen edhe hotele me 3 apo 4 yje. Përmes Agjencisë Kombëtare të Planifikimit të Territorit është çelur, në fund të muajit dhjetor, edhe konkursi ndërkombëtar mbi idetë e projektimit.
“Agjencia Kombëtare e Planifikimit të Territorit me kërkesë të Kryetares së Grupit të Punës ngritur me Urdhër të Kryeministrit, si edhe në zbatim të Vendimit të Këshillit të Ministravr “Për ngarkimin e Agjencisë Kombëtare të Planifikimit të Territorit … për realizimin e konkursit të projektimit për projektidetë e zhvillimit të Tirana Expo…”, shpall thirrjen e hapur për Konkursin Ndërkombëtar për Projekt-Ide Arkitektonike, në kërkim të zgjidhjes më të mirë të projektimit për zhvillimin e Expo Albania, një hapësirë fleksibël për ekspozita, panaire, koncerte, takime, evenimente, rekreacion dhe logjistikë, e cila do të jetë funksionale gjatë gjithë javës, për çdo muaj të vitit, dhe ku tematikat do të jenë kryesisht të fokusuara rreth të rinjve”, thuhet në dokumentin qeveritar.
Qendra është projektuar që të ndërtohet në ish-zonën ushtarake të Farkës, e përdorur si zonë parkimi për helikopterë. Kjo vendodhje konsiderohet një nyje e rëndësishme, pasi gjendet përgjatë unazës së jashtme të Tiranës, me një lidhje të shpejtë me aeroportin, Korridorin Blu (korridori Adriatiko-Jonian që lidh Malin e Zi, Shqipërinë dhe Greqinë), Korridorin VIII (rruga Egnatia) si dhe Portin e Durrësit.
Për zbatimin e projektit, Qeveria nuk ka përcaktuar fond limit, duke vënë në dukje se vlera e saktë do të përllogaritet pas shpalljes së fituesit.
Qendra do të përfshijë disa salla ekspozimi, konferencash dhe mbledhjeje, auditorë si dhe të gjitha hapësirat e nevojshme mbështetëse, teknike dhe të magazinimit. “Duhet të projektohet për të qenë e gatshme të akomodojë ekspozita, panaire dhe evenimente që mbulojnë një gamë të gjerë sektorësh, si: ai i ndërtesave, ndërtimit, inxhinierisë, prodhimit, pasurive të paluajtshme, menaxhimit, shëndetit, mjekësisë dhe farmaceutikës, shtëpive, kopshteve, dhuratave, kozmetikës, bukurisë, të dhënave, IT dhe teknologjisë, energjisë, automobilistikës, transportit, medias dhe kontentit, kulturës ‘pop’, lojërave elektronike, shtypshkrimit dhe paketimit, sigurisë dhe mbrojtjes, sportit dhe mirëqenies, udhëtimit dhe turizmit”, theksohet ndër të tjera në dokument. “Expo Albania” do të jetë qendra më e madhe në kryeqytet, duke tejkaluar kapacitetet e Pallatit të Kongreseve si edhe të dy qendra të tjera të ngjashme, të ndërtuara nga kompani private.
Ada Hazizolli/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
