Viti që lamë pas ka qenë sfidues për bujqësinë, pasi i është dashur të përballet me të papritura të shkaktuara nga lufta në Ukrainë, të cilat kërkonin masa emergjente. Si e tillë, buxheti vjetor fillestar i Ministrisë së Bujqësisë për vitin 2022 u akordua në rreth 12.7 miliardë lekë dhe me shtesat që u bënë përgjatë vitit, shpenzimet totale rezultojnë në rreth 13.5 miliardë lekë, me një realizim në masën 99.8%. Por cili nga sektorët mori pjesën më të madhe të fondeve?
Në realizimin vjetor, peshën më të madhe në nivelin e realizimit ndaj totalit e zë programi buxhetor “Zhvillimi Rural” me 64.7 %, apo rreth 8.8 miliardë lekë, pas tij programi “Infrastruktura e Kulllimit dhe Ujitjes” me 13.4 %, ku janë shpërndarë 1.8 miliardë lekë dhe programi “Siguria Ushqimore” me 12.7%, për të cilin janë shpenzuar 1.7 miliardë lekë. Gjatë vitit 2022, pati një rritje të ndjeshme të fondeve për masat e mbështetjes, që arriti në rreth 5.1 miliardë lekë në total, nga të cilat 3.2 miliardë lekë për skemat kombëtare. Ku është buxheti më i madh që Ministria e Bujqësisë ka pasur për mbështetjen e fermerëve.
Kështu, për të lehtësuar situatën për fermerët nisur nga pasojat e luftës në Ukrainë, një fond prej 1.2 miliard lekë iu shtua skemës për kultivimin e grurit. Nga masat kombëtare përfituan afro 14 mijë fermerë. Aplikimi dhe disbursimi më i madh i fondeve ishte tek masa e blegtorisë, ndjekur nga masa për kultivimin e grurit me dhe mbështetja për bletarinë. Sa i takon skema së mbështetjes me naftë për bujqësinë, kërkesa ka qenë shumë e lartë, ku kanë përfituar 34 731 aplikues, të cilët tërhoqën një sasi prej 8.3 milion litra naftë. Fondi për këtë masë të mbështetjes u shtua gjatë vitit me 500 milion lekë, duke arritur në 1, 9 miliard lekë me një realizim prej 100%.
Fondet sipas programeve buxhetore 2022
Zhvillimi rural 8,78 mld lekë 64.7 %
Infrastruktura e Kullimit dhe Ujitjes 1.82 mld lekë 13.4%
Siguria Ushqimore 1.72 mld lekë 12.7%
Elisabeta Dosku /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
