100 milionë euro brenda një muaji. Kaq ka shpenzuar buxheti i shtetit vetëm gjatë marsit për investime publike, duke liruar thesin në prag të zgjedhjeve vendore.
Të dhënat e Ministrisë së Financave tregojnë se shpenzimet kapitale u rritën ndjeshëm në muajin e tretë të vitit, veçanërisht për projektet me financim të brendshëm, pra paratë e qeverisë dhe jo ato me kredi apo të donatorëve. Krahasuar me 3 muajt e parë të vitit të kaluar, investimet publike janë rritur 1.7 herë në total dhe 3.7 herë më shumë me financim të brendshëm.
876 milionë lekë të tjera, apo 7.9 milionë euro kanë ardhur nga fondi i rindërtimit. Ndërsa fondet që i kalojnë direkt bashkive nga qeveria arritën në 12.5 miliardë lekë, nga 7.7 miliardë në mars 2022.
Vetë pushteti vendor nga ana tjetër, krahas tenderave dhe shpenzimeve të veta në javët që i paraprijnë fushatës, duket se po mbyllin një sy edhe në mbledhjen e taksave. Të ardhurat e realizuara në 3 muaj janë vetëm 5 miliardë lekë, nga 7.7 miliardë lekë në 2022-in, me taksat lokale të ulura me 40%.
Bashkitë po tregohen më tolerante edhe me gjobat e parkimit. Nëse në janar ishin rreth 26 mijë masa administrative të vendosura, në shkurt ky numër ra drastikisht në 9 mijë gjoba, një fenomen që vazhdoi edhe gjatë marsit dhe prillit.
Shpenzimet e përshpejtuara dhe mosmbledhja e taksave direkte mbi biznesin është një dukuri që përsëritet prej dekadash tashmë në çdo fushatë zgjedhore, periudhë që përkon edhe me hyrjen në fuqi të rritjes së pagave apo bonuseve të ndryshme.
Rënia e euros, Qeveria “e fituara e madhe”
Burimi: A2 CNN
