Kristi Ceta/
Një hotel në shkretëtirën e Teksasit po ndërtohet shtresë pas shtrese me një printer 3D, që ka madhësinë e një vinçi. El Cosmico, një hotel ekzistues dhe vend kampingu në periferi të qytetit të Marfa, po zgjerohet më tej. Aty po ndërtohen 43 njësi të reja dhe 18 shtëpi banimi mbi 16 hektarë, të gjitha me anë të printerit 3D.
Është hoteli i parë në botë i këtij formati, thotë pronarja e El Cosmico, Liz Lambert dhe partnerët pas projektit, kompania e printimit 3D me bazë në Austin, ICON, dhe arkitektët e Bjarke Ingels Group.
Pronarja Lambert tha se teknologjia lejon kreativitet të niveleve që nuk janë konceptuar më parë. “Pjesa më e madhe e hoteleve janë të kufizuara brenda katër mureve dhe shumë herë ju po ndërtoni të njëjtën njësi pa pushim,” u shpreh Lambert. “Unë kurrë nuk kam qenë në gjendje të ndërtoj me kaq pak kufizime dhe me një rrjedhshmëri të tillë si tani … Është një mënyrë e çmendur për të ndërtuar,” shtoi ajo.
Njësitë mund të përfshijnë veçori arkitekturore që normalisht do të ishin shumë të shtrenjta për t’u përsëritur në një shkallë të gjerë me ndërtimin tradicional, sipas Lambert.
Muret njëkatëshe, 3,7 metra të larta të dy njësive të para në ndërtim janë një hapësirë banimi me tre dhoma gjumi dhe njësi hoteli me një dhomë. Muret e lakuara me ngjyrë bezhë po “dalin” nga ICON’s Vulcan, një printer 3D i gjerë 14,2 m, me lartësi 4,7 m dhe peshon 4,75 tonë.
“Boja” e këtij printeri 3D është një material i veçantë me bazë çimenton, i quajtur Lavacrete, një përzierje e krijuar për forcë, përballueshmëri dhe printueshmëri. CEO dhe themeluesi i ICON Jason Ballard tha se punëtorët rregullojnë dhe përziejnë përbërësit bazuar në kushtet e motit. Ai shtoi se lagështia, temperatura dhe rrezatimi ndikojnë në formën e materialit e madje edhe në ngjyrën përfundimtare.
Zgjerimi i El Cosmico pritet të përfundojë deri në vitin 2026. Njësitë e hoteleve do të variojnë nga 200 deri në 450 dollarë për natë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
