Gjatë muajit janar, Agjencia Kombëtare e Arsimit, Formimit Profesional dhe Kualifikimeve (AKAFPK) në bashkëpunim me Swisscontact Albania / projekti “Aftësi për Punë” (S4J) organizuan një seri takimesh me përfaqësues të gjashtë industrive kryesore në vend, për të konsultuar listën e profesioneve dhe kualifikimeve profesionale që i nevojiten tregut dhe që ofrohen nga arsimi profesional.
Diskutimet u fokusuan në rishikimin e kualifikimeve ekzistuese dhe hartimin e të rejave, në sektorë si termohidraulika, elektroteknika, tekstil-konfeksioni, përpunimi i drurit, teknologjia ushqimore dhe shërbimet e mjeteve të transportit. Përfaqësuesit nga biznesi shprehën interes të veçantë për modelin e arsimit dual, ku nxënësit kombinojnë formimin teorik me praktikën në kompani, duke punuar tre ditë në javë gjatë kohëzgjatjes së programit.
“Modeli dual krijon mundësi konkrete për të rinjtë dhe i përgjigjet nevojave të industrisë sonë për staf të kualifikuar”.
Ada Hidri, CEO e SHAGA Design & Furniture
Arsimi profesional dual po zbatohet në Shqipëri që nga viti shkollor 2024-25. Numri i nxënësve dhe kompanive që përfshihen në këtë formë bashkëpunimi është në rritje dhe përvoja ka rezultuar shumë pozitive për aktorët e përfshirë. Gjatë vitit të ardhshëm shkollor, më shume kualifime duale do të ofrohen për të rinjtë dhe kompanitë në qytete të ndryshme të Shqipërisë.
“Aftësi për Punë” (S4J), një projekt i Agjencisë Zvicerane për Zhvillim dhe Bashkëpunim (SDC) i zbatuar nga Swisscontact, po punon për krijimin e një sistemi të qëndrueshëm të arsimit dhe formimit profesional që u përgjigjet kërkesave të tregut të punës dhe u ofron të rinjve mundësi reale për zhvillim profesional.
Postimi ” Industria në dialog me arsimin profesional për profesionet e kërkuara nga tregu ” eshte marre nga Revista Monitor.
