Rritja e pagave, shoqëruar me shtim të konsumit dhe pasiguritë në tregun e punës po “mbajnë gjallë” krizën e çmimeve në vend. Banka e Shqipërisë vlerëson se ndryshe nga një vit më parë kur inflacioni u rrit si efekt importi nga prishja e zinxhirëve prodhues dhe bllokadave në kufij, këtë fillim-vit kriza po vjen nga brenda.
“Ky është një lajm që duhet të zgjojë institucionet për t’u marrë pikërisht me ato probleme të brendshme të cilat shfaqin rreziqe në rritje. Ashtu siç e tha edhe Guvernatori, pjesa më e madhe e rreziqeve të brendshme ekonomia jonë i ka të trashëguara dhe emëruesi i përbashkët është spekulimi dhe pafuqia e institucioneve”, tha eksperti Eduart Gjokutaj.
Afrimi i sezonit turistik veror ndërkohë pritet të rrisë edhe më tej presionin e brendshëm te inflacioni. Rritja e pagave të punonjësve në sektorin e turizmit do të shkarkohet mbi supet e pushuesve vlerëson eksperti Eduart Gjokutaj.
Këtë vit, rënia e çmimeve nga importi si pasojë edhe e zhvlerësimit të euros po ulin inflacionin e përgjithshëm në vend. E kundërta po ndodh me ushqimet dhe pijet. Për shkak te presioneve të brendshme, inflacioni te këto kategori produktet në harkun e muajve janar-mars u rrit në 12.6 për qind nga 7.6 që ishte në po të njëjtën periudhë të një viti më parë.
Burimi: A2 CNN
