Norma e inflacionit në Mbretërinë e Bashkuar u rrit ndjeshëm në 3% në janar, më lart se pritshmëritë 2.8% të analistëve, sipas të dhënave të publikuara nga Zyra për Statistikat Kombëtare (ONS).
Indeksi i çmimeve të konsumit të Britanisë (CPI) ra në 2.5% në dhjetor, më ulët se sa pritej, me rritjen e çmimeve bazë gjithashtu në rënie të mëtejshme.
Inflacioni bazë, i cili përjashton çmimet më të paqëndrueshme të energjisë, ushqimeve, alkoolit dhe duhanit, u rrit me 3.7% në 12 muajt deri në janar, nga 3.2% në muajin e kaluar. Veçanërisht, norma vjetore e shërbimeve bazë u rrit nga 4.4% në 5.0%, tha ONS.
“Inflacioni u rrit ndjeshëm këtë muaj në shkallën më të lartë vjetore, që nga marsi i vitit të kaluar. Rritja u shkaktua nga çmimet e fluturimeve, që nuk bien aq sa shohim zakonisht në këtë periudhë të vitit, pjesërisht e ndikuar nga koha e fluturimeve gjatë Krishtlindjeve dhe Vitit të Ri. Ky ishte ritmi më i ulët i rritjes për muajin janar, që nga viti 2020,” komentoi të mërkurën Grant Fitzner, kryeekonomist i ONS.
Duke iu përgjigjur të dhënave më të fundit, kancelarja e Mbretërisë së Bashkuar Rachel Reeves tha se ofrimi i rritjes ekonomike dhe marrja e më shumë parave në xhepat e njerëzve ishin prioritetet e saj, ndërsa pranoi se miliona familje janë ende duke luftuar për të përballuar jetesën.
Paundi britanik ndryshoi pak kundrejt dollarit pas publikimit të të dhënave, duke u tregtuar me 1.2615 dollarë.
Rritje e ngadaltë
Norma e inflacionit në Mbretërinë e Bashkuar kishte arritur një nivel më të ulët prej më shumë se tre vjetësh prej 1.7% në shtator, por çmimet mujore janë rritur që atëherë, si pasojë e kostove më të larta të karburantit dhe tarifave të shërbimeve, që rriten më shpejt se çmimi i mallrave.
Këtë muaj, rritja e ngadaltë dhe një rënie e fundit e inflacionit e shtynë Bankën e Anglisë (BoE) të bënte uljen e parë të normës së interesit të vitit, duke e ulur normën bazë në 4.5%.
Banka qendrore sinjalizoi ulje të mëtejshme të normave, por vuri në dukje se kostot më të larta globale të energjisë dhe ndryshimet e rregulluara të çmimeve, pritet të rrisin inflacionin total në 3.7% në tremujorin e tretë të 2025, “edhe pse presionet themelore të brendshme inflacioniste pritet të zvogëlohen më tej”. BoE pret që norma e inflacionit të bjerë në objektivin prej 2% deri në vitin 2027.
Së bashku me perspektivën e rritjes së çmimeve, banka qendrore gjithashtu përgjysmoi parashikimin e rritjes ekonomike të Mbretërisë së Bashkuar, nga 1.5% në 0.75% këtë vit.
Rritja e fundit në inflacionin e CPI-së nuk ishte befasi, por ishte më e madhe nga sa prisnin të gjithë, vuri në dukje Ruth Gregory, zëvendës drejtues ekonomik për MB në Capital Economics.
“Nuk është sekret, që çmimet më të larta të energjisë do ta shtyjnë inflacionin e CPI-së më tej mbi 3% gjatë 7 muajve të ardhshëm. Dyshojmë se kjo do ta pengojë bankën të ulë më tej normat. Në të vërtetë, ne ende mendojmë se inflacioni do të bjerë nën 2% në 2026, pasi zbehja e disa ndikimeve të përkohshme dhe ekonomia e dobët, ushqehen me uljen e inflacionit të shërbimeve,” tha ajo.
“Rreziku është, që rritja e inflacionit të rezultojë më e qëndrueshme dhe normat të ulen më ngadalë sesa presim, ose jo aq shumë”, shtoi Gregory. / CNBC
Postimi ” Inflacioni në Mbretërinë e Bashkuar rritet 3% në janar, më lart se pritshmëritë ” eshte marre nga Revista Monitor.
